VOV4.Bahnar - Pơgê năr 13/12, lơ̆m ‘măng năm tơmang tĕh đak Hàn Quốc, Kơdră chĕp pơgơ̆r Kuô̆k hô̆i Vương Đình Huệ hlôi sơng pơma dơnŭh hăm Kơdră chĕp pơgơ̆r rim Grŭp jang, hơnĭh mơdro sa kơ Hàn Quốc.

Tơ̆ jơ tơ ƀơ̆p rim khŭl, Kơdră chĕp pơgơ̆r Kuô̆k hô̆i Vương Đình Huệ pơma hơdăh, Việt Nam păng Hàn Quốc tŏk bŏk hơdrin ba tơdrong tơgoăt tơgoăl dĭh băl kơtang hlŏh dơ̆ng ƀlep lơ̆m năr tơbăt 30 sơnăm pơjing tơbôl. Jang hơdoi mŭk drăm ‘nŏh mĭnh trong jang tơm hlŏh kơ yuơ lơ lŏh ‘măng năm tơmang au đei lăng jing hơdrin đĭ ai vă atŏk kơtang jang hơdoi mŭk drăm, mơdro sa dĭh băl iŏk đei nơ̆r pơkăp trŭh 100 ti dolar lơ̆m sơnăm 2023. Tơ̆ tơ ƀơ̆p rim kơdră chĕp pơgơ̆r Grŭp jang Samsung Electronics, Kơdră chĕp pơgơ̆r Kuô̆k hô̆i Vương Đình Huệ tơbăt, Việt Nam tơgum djru trong pơ prŏ pơ̆ih să tơmơ̆t jên jang mơdro sa kơ Kŏng ty lơ̆m khei ‘năr kơnh; hôn bơnê kơtang trong vă jang tơgum djru hơnĭh mơdro sa Việt Nam vang jang lơ̆m tĕch mơdro lơ̆m plei tĕh kơ Samsung; adoi athei Kŏng ti đei trong tơlĕch jang hơdăh vă tơgŭm djru rim hơnĭh mơdro sa Việt Nam pơm tơlĕch đei tơmam drăm ‘lơ̆ng păng kĕ pơjei dĭh băl vă kĕ vang iung jang lơ̆m tơdrong tĕch mơdro lơ̆m plei tĕh kơ Grŭp jang Samsung păng Kŏng ty pơma hơdrô̆.

Tơblơ̆ nơ̆r: Amazưt