VOV4.Bahnar - Kơsơ̆ năr 29/11, tơ̆ Hnam Kuô̆k hô̆i, Kơdră chĕp pơgơ̆r Kuô̆k Hô̆i Vương Đình Huệ hlôi sơng pơma dơnŭh hăm Kơdră tang măt Tĕh đak Hàn Quốc Park Noh-Wan tơ̆ Việt Nam trŭh kŭh ka hla bat.

Tơ̆ jơ sơng pơma dơnŭh, Kơdră chĕp pơgơ̆r Kuô̆k hô̆i Vương Đình Huệ pơma hơdăh, Việt Nam - Hàn Quốc đei tơdrong tơgoăt tơgoăl Jang sa hơdoi gĭt kăl, sơnăm 2022, ƀar tĕh đak tơbăt 30 sơnăm pơjing tơbôl, rơ̆ih iŏk vă ƀar tĕh đak hơnhăk tơgoăt tơgoăl kơtang hlŏh dơ̆ng lơ̆m khei năr kơnh. Mă kăl, khei năr au ki, tơgoăt tơgoăl ƀar tĕh đak tơ̆ rim tơdrong jang Tĕh đak, Kuô̆k hô̆i, Khŭl Kơdră tĕh đak, kon pơlei yak năm dĭh băl đei atŏk kơtang, ư̆h kơ mơ̆ng bri tơdrong đei ƀơm ư̆h kơ ‘lơ̆ng hơ iă đơ̆ng jĭ hơbŭh, Kơdră chĕp pơgơ̆r ƀar tĕh đak hlôi đei rim ‘măng tơ ƀơ̆p dĭh băl trư̆k tuyên hăm kơtă. Lăp đon hăm nơ̆r chă apĭnh đơ̆ng Kơdră tang măt tĕh đak Hàn Quốc, Kơdră chĕp pơgơ̆r Kuô̆k hô̆i Vương Đình Huệ tơbăt, Đảng, Tĕh đak Việt Nam tok bŏk pơrô̆ hrôih pơ̆ih trong păr apŭng plĕnh tĕh atŭm hăm rim trong pơkăp găh hô̆ chiê̆u vaccine. Khŭl kơdră Tĕh đak, rim hơnĭh bơ̆ jang đei ƀơm trŭh jang kiơ̆ nơ̆r athei jang au.

Tơblơ̆ nơ̆r: Amazưt