VOV4.Bahnar - Ƀlep lơ̆m năr Ƀok thây kô Việt Nam (20/11), kơsơ̆ brei, năr 19/11, Kơdră chĕp pơgơ̆r Kuô̆k hô̆i Vương Đình Huệ hlôi vang năm Pơm lê̆h mơ̆t hŏk sơnăm hŏk 2021-2022 păng tơ ƀơ̆p mŭh măt, hmach bơnê rim ƀok thây kô tơ̆ Hnam trương Đăi hŏk Y Hà Nội.

Tang măt ăn Kơdră chĕp pơgơ̆r Đảng, tĕh đak, Kơdră chĕp pơgơ̆r Kuô̆k hô̆i Vương Đình Huệ pơma tơbăt jơhngơ̆m bơnê, hôn bơnê dôm tơdrong tơgop tĭh tên đơ̆ng khŭl kang ƀô̆, ƀok thây pơgang, bơngai jang pơgang, rim ƀok thây kô păng sinh viên hnam trương; dôm bơngai hlôi plang jơhngơ̆m jăn kơ dĭh năm tơ̆ tơring đei jĭ hơbŭh, tơgŭm jơhngơ̆m đon vei lăng năng tông jơhngơ̆m pran jăng grăng akau păng erĭh sa sơđơ̆ng ăn kon pơlei. Tơdra hơdrol, jĭ hơbŭh Covid-19 oei hơnơ̆ng pơrăm kơtang, mă lei hăm tơdrong vang kơrŭn đĭ jơhngơ̆m, pôm nơ̆r ƀơ̆r đon hơdrĕch hơdrung, nuih mơng  păng dôm tơdrong jang gơ̆h hơgei đơ̆ng rim ƀok thây pơgang, tơdrong vang iung jang đơ̆ng khŭl chĭnh trĭ, Kơdră chĕp pơgơ̆r Kuô̆k hô̆i Vương Đình Huệ lui, tĕh đak gô hrôih tang găn kĕ jĭ hơbŭh, vei lăng năng tông jơhngơ̆m pran jăng grăng akau ăn kon pơlei, hơmet pơ ‘lơ̆ng păng atŏk tơ iung mŭk drăm-tơpôl.

Tơblơ̆ nơ̆r: Amazưt