VOV4. Bahnar - Drung kơsơ̆ 20/12, tơ̆ Hnam Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ hlôi tơ ƀơ̆p mŭh măt rim Kơdră tang măt Tĕh đak, Kơdră chĕp pơgơ̆r Hơnĭh tang măt jang tơbôl Việt Nam tơ̆ tĕh đak đe brŏk vĭh vang hop akŏm Jang tơbôl ‘măng mă 31.

Kơdră chĕp pơgơ̆r Kuôk hô̆i tơ ƀơ̆p mŭh măt rim Kơdră tang măt tĕh đak, Kơdră chĕp pơgơ̆r hơnĭh tang măt jang tơbôl

Pơma dơnŭh tơ̆ jơ tơ ƀơ̆p, Kơdră chĕp pơgơ̆r Kuô̆k hôi Vương Đình Huệ pơma tơbăt hăm hơnĭh jang tơbôl adoi nhen hơnĭh jang tang măt jang tơbôl lơ̆m bơ̆ jang tơbôl tơ̆ tĕh đak đe, đei hơnĭh jang oei tôch atăih kơ Tĕh đak. Khei năr au ki, Hơnĭh tang măt Tĕh đak păng hơnĭh bơ̆ jang tang măt jang tơbôl Việt Nam oei tơ̆ tĕh đak đe jei đei ƀơm kơnê̆ kơtang đơ̆ng jĭ hơbŭh Covid-19. Kuô̆k hô̆i, Dơnŏ anĭh bơ̆ jang Kuô̆k hô̆i atŭm hăm Đảng, Tĕh đak jei lăng ba kơ jăp trŭh tơdrong tŏk jên khei ăn rim kang ƀô̆ jang tơbôl adoi nhen tơmơ̆t jên jang ming man hơnĭh bơ̆ jang tang măt tĕh đak, hơnĭh jang tang măt jang tơbôl Việt Nam tơ̆ tĕh đak đe. Mă lei, lơ hơnĭh oei tôch tơnap tap, glĕh hrat. Lơ̆m tơdrong au, rim kơdră tang măt tĕh đak, Kơdră chĕp pơgơ̆r hơnĭh tang măt jang tơbôl Việt Nam oei tơ̆ tĕh đak đe oei hơdrin yak hlŏh rim tơdrong tơnap tap vă bơ̆ jang iŏk đei jơnei hơ iă hlŏh.

Tơblơ̆ nơ̆r: Amazưt