VOV4.Bahnar - Tơbăt 75 sơnăm Năr Pơ đĭ lơ̆m tĕh đak iung tơblăh năr 19/12, pơgê năr 17/12, Khŭl kơdră tang măt pơlei tơm Hà Nội hlôi năm glơng ming gơvang pơkao tơ̆ Hơnĭh man tơbăt “Plang pham lĕch sĕch huŏng vă Tĕh đak rơngei keh kong”, pơgar pơkao Hàng Dậu, phương Quán Thánh, quận Ba Đình. Năr 19/12, 75 sơnăm sơ̆, pơm kiơ̆ Nơ̆r krao hơvơn Pơ đĭ lơ̆m Tĕh đak iung tơblăh đơ̆ng Kơdră chĕp pơgơ̆r Tĕh đak Hồ Chí Minh, ƀô̆ đô̆i păng kon pơlei Hà Nội hlôi yơ̆r hla kơ “Plang pham lĕch sĕch huŏng vă Tĕh đak rơngei keh kong”, pơm ăn rim trong kơphô̆, rim ŭnh hnam jing dui pơvang iung tơblăh kơ kon pơlei, pơ đĭ kon pơlei tơblăh ayăt. Năm glơng gơvang pơkao tơ̆ Hơnĭh man tơbăt “Plang pham lĕch sĕch huŏng vă Tĕh đak rơngei hiôk hian” - tơbăt ăn tơbăt hơdăh jơnei nuih mơng pran kơtang đơ̆ng Ƀô̆ đô̆i păng kon pơlei Hơnĭh tơm lơ̆m 60 măng năr iung tơblăh Phalăng hơtuch sơnăm 1946, năr blŭng sơnăm 1947, kơdră chĕp pơgơ̆r pơlei tơm tơbăt jơhngơ̆m hmach bơnê tơdrong tơgop, tơdrong pham lech sĕch huŏng đơ̆ng rim jơ hnơr me ƀă yă ƀok yak hơdrol, dôm ƀô̆ đô̆i, kon pơlei hlôi pơjing đei chăl sơnăm nuih mơng, jing jơhngơ̆m đon hưch hanh hơmanh bơnê đơ̆ng rim răih kon pơlei Hà Nội hrei au păng ning nai kai ning mônh. Kơdră chĕp pơgơ̆r pơlei tơm hơdrin đĭ jơhngơ̆m kơrŭn đĭ jơhngơ̆m Kơdră chĕp pơgơ̆r Dơnŏ anĭh Đảng, kơdră tơring, ƀô̆ đô̆i păng kon pơlei Hà Nội hơnơ̆ng kiơ̆ yok rok jơ̆ng joăt joe tơgoăt tơgoăl mĭnh nơ̆r ƀơ̆r đon, vang iung jang tơ iung pơjing păng atŏk tơ iung Hơnĭh tơm tơgăl hăm hơnăp jang jing Hơnĭh tơm bơ̆ jang chĭnh trĭ-bơ̆ jang tĕh đak kơ lơ̆m tĕh đak.

Tơblơ̆ nơ̆r: Amazưt