VOV4.Bahnar - Kơsơ̆ năr 6/9, tơ̆ Hơnĭh bơ̆ jang Kơdră chĕp pơgơ̆r tĕh đak, Kơdră chĕp pơgơ̆r Tĕh đak Nguyễn Xuân Phúc sơng pơma dơnŭh hăm Kơdră tang măt Ấn Độ tơ̆ Việt Nam Pranay Verma. Kơdră chĕp pơgơ̆r Tĕh đak pơma tơbăt jơhngơ̆m đon hôn bơnê kơ Khŭl kơdră Ấn Độ hlôi tơgŭm Việt Nam kmăi pơm đei oxy păng rim tơmam drăm jang pơgang. Kơdră chĕp pơgơ̆r Tĕh đak ‘mĕh vă Kơdră tang măt tĕh đak Ấn Độ ăn Việt Nam tŏk iŏk hăt hot 10 trĭu kơliêu vaccine lơ̆m khei năr kơnh, adoi pơtrŭh ăn rim pơgang ming hơmet jĭ Covid-19 adoi nhen rim tơmam drăm jang pơgang ăn Việt Nam. Lơ̆m khei năr kơnh, Kơdră chĕp pơgơ̆r Tĕh đak Nguyễn Xuân Phúc athei Kơdră tang măt lăng ba kơ jăp pơtrŭt kơtang jang hơdoi ƀar tĕh đak. Lơ̆m au đei vei kơ jăp păng pơtrŭt kơtang ăn khŭl kơdră kơpal, rim hơnĭh tơƀơ̆p dĭh băl păng kon pơlei chă năm ngôi dĭh băl; pơtrŭt kơtang jang kiơ̆ rim trong jang hơdoi đei nhen Dơnŏ anĭh jang hơdoi Việt Nam-Ấn Độ găh Jang hơdoi Mŭk drăm Mơdro sa, Khoa hŏk păng Kmăi kmŏk; Hơlen trong jang Chĭnh trĭ hăm trong pơgơ̆r trư̆k tuyên dăh mă kơtă. Ƀar păh kăl jang hơdoi pơgơ̆r rim tơdrong jang ‘lơ̆ng hơ iă, tơpă tơbăt 50 sơnăm năr pơjing tơbôl; hơdrin pơtrŭt kơtang jang kiơ̆ Tơdrong jang tơlĕch tơgoăt tơgoăl Jang hơdoi gĭt kăl tôm tong jăl jang 2021-2023 vă tơlĕch jang ‘lơ̆ng hlŏh dơ̆ng rim tơdrong jang hơdoi mă ƀar păh hlôi drơ̆ng mĭnh nơ̆r.

Tơblơ̆ nơ̆r: Amazưt