VOV4.Bahnar - Năr 7/6, Kơdră chĕp pơgơ̆r Tĕh đak Nguyễn Xuân Phúc, Kơdră Dơnŏ anĭh chĕp pơgơ̆r Hơmet pơ ‘lơ̆ng Tư pháp bơ̆ jang hăm Khŭl kơdră chĕp pơgơ̆r Đảng Dơnŏ anĭh tơm xek tơlang găh Tơdrong vă jang: “Tơplĭh ‘nao Khŭl jang Dơnŏ anĭh xek tơlang kơ toĕi bơ̆ jang ‘lơ̆ng, jơnei kiơ̆ Tơdrong tơchơ̆t Trung ương 6 jăl XII kơ Đảng ƀlep hăm tơdrong ‘mĕh vă lơ̆m chăl ‘nao”.

Lăp đơ̆ng rŏng rim Hơnĭh tơm, hơnĭh bơ̆ jang pơma tơbăt nơ̆r tơgop, pơma pơtôch jơ bơ̆ jang, Kơdră chĕp pơgơ̆r tĕh đak Nguyễn Xuân Phúc pơma hơdăh tơdrong kăl đei chĭh tơmơ̆t lơ̆m Tơdrong tơchơ̆t 49 kơ Dơnŏ anĭh tơm Chĭnh trĭ ‘nŏh hơmet pơ ‘lơ̆ng rim khŭl jang, hơnĭh bơ̆ jang tư pháp; lơ̆m au tơdrong kăl ‘nŏh tơ iung pơjing, hơmet pơ ‘lơ̆ng khŭl jang păng tơdrong jang kơ Dơnŏ anĭh tơm xek tơlang. Kơdră chĕp pơgơ̆r Tĕh đak pơkă, tơdrong jang pơlong năng hơnơ̆ng tơ iung pơjing hơnĭh xek tơlang tơring tôch gĭt kăl, ‘nau jei jing tơdrong hơnơ̆ng jang kiơ̆ tơ iung pơjing trong jang hơmet pơ ‘lơ̆ng bơ̆ jang tư pháp ‘nao 2021-2030, lăng trŭh sơnăm 2045 kiơ̆ trong tơlĕch jang Tơdrong tơchơ̆t 49 đơ̆ng Dơnŏ anĭh tơm Chĭnh trĭ. Mă kăl, rim Dơnŏ anĭh xek tơlang tơring kăl sơđơ̆ng kiơ̆ trong dăr lăng hơlen đơ̆ng Jơnŭm vei lăng kon pơlei, Kuô̆k hô̆i, Mặt trận Tổ Quốc Việt Nam, mă kăl ‘nŏh kon pơlei hăm hơnĭh jang xek tơlang.

Tơblơ̆ nơ̆r: Amazưt