VOV4.Bhanar - Kơsơ̆ năr 13/12, tơ̆ Hơnĭh bơ̆ jang Kơdră chĕp pơgơ̆r Tĕh đak, Kơdră chĕp pơgơ̆r Tĕh đak Nguyễn Xuân Phúc hlôi sơng pơma dơnŭh hăm 60 ‘nu bơngai tang măt hơgei dơ̆ng pang tang măt ăn rim kơdră tang măt vang năm Pơm lêh hop akŏm bơngai tang Drŏ kăn Ƀô̆ đô̆i ‘măng mă VII ‘nao đei pơgơ̆r pơtôch jơnei keh kong tơ̆ Hà Nội. Iung pơma tơ̆ jơ tơ ƀơ̆p mŭh măt, Kơdră chĕp pơgơ̆r tĕh đak hôn bơnê dôm bơngai drŏ kăn Ƀô̆ đô̆i ling lang hơdrin yak hlŏh tơnap tap, jang keh đang rim tơdrong jang đei pơjao, adoi jang ‘lơ̆ng hơnăp jang kơ bơngai drŏ kăn, ‘nŏh dôm bơngei vei kơ jăp oei sa tơ ƀĕ dang dŏng tơ ƀŏng dang dan lơ̆m ŭnh hnam. Drŏ kăn Ƀô̆ đô̆i tơpă jing dôm bơngai “Hơgei tơdrong jang tĕh đak, tơnăp tơdrong jang lơ̆m ŭnh hnam”. Hăm hlŏh 90.000 ‘nu kang ƀô̆, khŭl jang păng hlŏh 2.000 khŭl tơ̆ tơring, bơngai drŏ kăn Ƀô̆ đô̆i tŏk bŏk ƀô̆h kang bang kơ̆l jơ̆p tơring tơrang lơ̆m Tĕh đak. Mă đơ̆ng oei tơ̆ yơ, jang kơ chư̆k yă kiơ, Bơngai drŏ kăn Ƀô̆ đô̆i ling lang jang kiơ̆ ‘lơ̆ng jơhngơ̆m đon kơ Ƀô̆ đô̆i Ƀok Hô. Mă kăl, jăl jang 2016 - 2021 ‘măng mă blŭng đei 41 ‘nu bơngai drŏ kăn bơ̆ jang lơ̆m khŭl Ƀô̆ đô̆i vang bơ̆ jang lơ̆m khŭl vei lăng rơngei hiôk hian kơ Liên hợp quốc. Lơ̆m jang tang găn jĭ hơbŭh Covid-19 hlôi đei 1.700 ‘nu bơngai drŏ kăn chĭh hơnăn năm iung jang tang găn jĭ hơbŭh.

Tơblơ̆ nơ̆r: Amazưt