VOV4.Bahnar - Kơsơ̆ năr 15/10, Kơdră chĕp pơgơ̆r Tĕh đak Nguyễn Xuân Phúc bơ̆ jang hăm Khŭl kơdră chĕp pơgơ̆r Đảng Dơnŏ anĭh tơm Xek tơlang.

Kơdră chĕp pơgơ̆r Tĕh đak Nguyễn Xuân Phúc bơ̆ jang hăm Khŭl kơdră chĕp pơgơ̆r Đảng Dơnŏ anĭh tơm Xek tơlang

Iung pơma tơ̆ jơ bơ̆ jang, Kơdră chĕp pơgơ̆r Tĕh đak Nguyễn Xuân Phúc hôn bơnê kơ tang kơ hơnĭh jang xek tơlang hlôi jang ‘lơ̆ng hơnăp jang, tơdrong jang xek tơlang, jang kiơ̆ hơnăp jang khôi luơ̆t, vei lăng tơdrong ƀlep, tơdrong trŏ, tơdrong lăp ăn rim hơnĭh jang, rim khŭl, rim bơngai. Mă kăl hlôi đei trong jang ‘lơ̆ng hơ iă hlŏh lơ̆m tơchơ̆t xek tơlang kơ Dơnŏ anĭh xek tơlang; tơplĭh ‘nao trong xek tơlang, pơgơ̆r xek tơlang ‘moi kiơ̆ trong hơmet ming khôi luơ̆t tơm tĕh đak, lăp hăm trong bơ̆ jang atŭm lơ̆m apŭng plĕnh tĕh. Đơ̆ng nŏh tơgop hơmet pơ ‘lơ̆ng jơhngơ̆m đon hôn bơnê, gơnăng yua đơ̆ng kon pơlei lơ̆m tơdrong jang khôi luơ̆t tơpăt, kơ hret, ƀlep hăm Khôi luơ̆t. Kơdră chĕp pơgơ̆r Tĕh đak athei dơnŏ anĭh xek tơlang kăl iung jang kơtang hlŏh dơ̆ng, tơlĕch xek tơlang tơtom, kơhret rim tơdrong sa pơgơ̆m pơjĭp, tơdrong yoch mŭk drăm kơtang, mơmat păng rim tơdrong mă tơpôl lăng trŭh kiơ̆ trong jang “ư̆h kơ đei hơnĭh lon, ư̆h kơ đei ver, ư̆h kơ pơm kiơ̆ dôm tơdrong vang găn ga ư̆h kơ ƀlep đơ̆ng rim bơngai, khul ayơ”.

Tơblơ̆ nơ̆r: Amazưt