VOV4.Bahnar - Pơgê năr 30/6, tơ̆ Hơnĭh bơ̆ jang Kơdră chĕp pơgơ̆r Tĕh đak, Kơdră chĕp pơgơ̆r Tĕh đak Nguyễn Xuân Phúc hlôi bơ̆ jang trư̆k tuyên găm ƀok Choi Young Joo, Kơdră chĕp pơgơ̆r Khŭl tơgoăt tơgoăl Hàn-Việt, adoi jang Kơdră chĕp pơgơ̆r Grŭp jang Panko. Kơdră chĕp pơgơ̆r Khŭl tơgoăt tơgoăl Hàn-Việt tơbăt, rim hơnĭh mơdro sa Hàn Quốc hlôi vang chă tơra đei 1 trĭu dolar tơgŭm Việt Nam jang tang găn jĭ hơbŭh Covid-19. ‘Moi kiơ̆ Khŭl tơgoăt tơgoăl Hàn – Việt, Kơdră chĕp pơgơ̆r Tĕh đak Nguyễn Xuân Phúc krao hơvơn rim hơnĭh mơdro sa Hàn Quốc hơnơ̆ng tơgŭm djru Việt Nam tang găn jĭ Covid-19, adoi atŏk kơtang tơmơ̆t jên jang lơ̆m rim tơdrong jang nhen khoa hŏk kmăi kmŏk, jang pơm tơlĕch pơgang, pơlei tơm gơ̆h hơgei păng lơ tơdrong jang anai. Kơdră chĕp pơgơ̆r Tĕh đak hôn bơnê kơ ƀok Choi Young Joo, Kơdră chĕp pơgơ̆r Khŭl tơgoăt tơgoăl Hàn – Việt, Grŭp jang Panko păng rim grŭp jang anai kơ Hàn Quốc nhen Samsung, SK,…, hlôi ‘măn jơhngơ̆m đon ‘lơ̆ng hơ iă ăn kơ Việt Nam, mĭnh păh tơgŭm ăn Việt Nam tang găn jĭ hơbŭh, mĭnh păh pơtrŭt athei rim grŭp jang tĭh kơ Hàn Quốc tơmơ̆t jên jang tơ̆ Việt Nam.

Tơblơ̆ nơ̆r: Amazưt