VOV4. Bahnar -  Kơsơ̆ năr 27/12, Khŭl tang măt Kuô̆k hô̆i pơlei tơm Hồ Chí Minh bơ̆ jang hăm Dơnŏ anĭh vei lăng kon pơlei kơ pơlei tơm vă dăr lăng tơdrong jang kiơ̆ trong bơ̆ jang, khôi luơ̆t găh pơ prŏ jang lơ̆m pơlei tơm Hồ Chí Minh. Kơdră chĕp pơgơr Tĕh đak Nguyễn Xuân Phúc vang năm tơ̆ hơnĭh pơdăh tơm lơ̆m Dơnŏ anĭh bơ̆ jang Kơdră chĕp pơgơ̆r Tĕh đak. Iung pơma tơ hop akŏm, Kơdră chĕp pơgơ̆r Tĕh đak Nguyễn Xuân Phúc pơma hơdăh, hăm mĭnh pơlei tơm tĭh nhen pơlei tơm Hồ Chí Minh ‘noh bơ̆ jang pơ prŏ jang kăl yak hơdrol mĭnh hơyak, kăl tơ ƀô̆h hơdăh trong jang kăl, pơm kơnăl ăn atŏk tơ iung pơ prŏ hơdrol, hơvơn kon jên jang pơđĭ đơ̆ng tĕh đak păng ŭnh hnam, sơkơ̆t hơdăh trong vă jang, trong tơlĕch jang hơdăh. Kơdră chĕp pơgơ̆r tĕh đak jei tơƀô̆h hơdăh, pơlei tơm Hồ Chí Minh tŏk bŏk tơ jur tơ̆ rŏng tôch kơ dêh pơtêng hăm rim tơring kơdrơ̆m tơm anai lơ̆m tơring găh atŏk tơ iung mŭk drăm păng tơdrong erĭh sa. Jơhngơ̆m đon pơm jŭk yŭk trong hơlau păng hơnĭh dơ̆ng hơlau kơ Pơlei tơm hăm pơ đĭ lơ̆m tĕh đak tŏk bŏk tơ jur kơtang. Kơdră chĕp pơgơ̆r tĕh đak Nguyễn Xuân Phúc athei pơlei tơm kăl lăng kơ jăp trŭh dôm trong tơlĕch jang, trong pơchŏh hơdrol, dôm tơdrong đei vă pơm keh đang trong pơ prŏ vă jang, adoi kăl iŏk yua trong pơ prŏ vă jang ‘nŏh jing tơdrong tơm ăn atŏk tơ iung pơlei tơm ‘lơ̆ng hơ iă, yak kơ jăp păng hơdăh hlŏh.

Tơblơ̆ nơ̆r: Amazưt