VOV4.Bahnar - Kơsơ̆ năr 30/7, Kơdră chĕp pơgơ̆r Tĕh đak Nguyễn Xuân Phúc năm ngôi păng bơ̆ jang hăm dêh char Bình Dương găh bơ̆ jang tang găn jĭ Covid-19. Kơdră chĕp pơgơ̆r Tĕh đak pơma hơdăh, Bình Dương ‘nŏh dêh char đei hơnăp jang tôch git kăl lơ̆m pơtrŭh tơmam drăm kơ tơdrong jang mŭk drăm Việt Nam, jing dêh char đei kơdrơ̆m kon pơlei, lơ hơnĭh mơdro sa, hnam kmăi, hơnĭh pơm tơlĕch tơmam drăm, jing hơnĭh tĕch mơdro dĭh băl kơ Đông Nam bộ hăm pơlei tơm Hồ Chí Minh, kơ yuơ lơ lŏh tơdrong jang tang găn jĭ tơ ƀơ̆p tôch lơ tơnap tap. Akhan Bình Dương oei đei khei ‘năr gĭt kăl hlŏh, Kơdră chĕp pơgơ̆r Tĕh đak athei dêh char kăl iung jang kơtang hlŏh dơ̆ng tang găn jĭ hơbŭh, mă kăl ‘nŏh mư̆h mĭnh ƀar hơnĭh bơ̆ jang tim mă jang kiơ̆ kơtang Nơ̆r athei jang kiơ̆ 15, 16 đơ̆ng Thủ tướng Tĕh đak, đơ̆ng nŏh pơm dă ƀiơ̆ măt bơngai tơpŏh păng hoei pơm ăn hrăt hrot tơ̆ rim hnam pơgang. Kơdră chĕp pơgơ̆r tĕh đak pơkă, mư̆h jang kiơ̆ pơvang tang găn păng ăn oei hơtăih dĭh băl, dêh char ‘nĕ lê̆ kon pơlei pơngot rơvĕt, jĭ jăn ư̆h kơ đei bơngai vei lăng năng tông; hơvơn đei lơ hlŏh dôm tơdrong tơgum djru đơ̆ng tĕh đak, tơring păng rim bơngai đei jơhngơ̆m đon ‘lơ̆ng vă vang tơgŭm djru rim tơring tơnap tap.

Tơblơ̆ nơ̆r: Amazưt