VOV4.Bahnar - Kơsơ̆ năr 15/11, lơ̆m ‘măng năm bơ̆ jang tơ̆ pơlei tơm Hồ Chí Minh, Kơdră chĕp pơgơ̆r Tĕh đak Nguyễn Xuân Phúc hlôi năm ngôi, pôk tơmam drăm ăn mĭnh ƀar ‘nu ƀok thây kô pơtho hơgei kơ pơlei tơm păng pôk bơnê rim ƀok thây kô ƀlep lơ̆m Năr Ƀok thây kô Việt Nam 20/11.

Kơdră chĕp pơgơ̆r Tĕh đak, hmach chơt hơ iă ăn PGS.TS, ƀok thây pơtho Lý Hòa, Bơngai nuih mơng Bơ̆ jang chăl tơplĭh ‘nao

Kơdră chĕp pơgơ̆r Tĕh đak hlôi năm ngôi, pôk tơmam drăm ăn cô pơtho, Thạc sĩ Triệu Thị Huệ, sơ̆ jang Kơdră Khŭl pơtho Ngữ văn, Hnam trương jăl ƀar pêng chuyên Lê Hồng Phong, lơ ‘măng đei hla bơar pôk hơpăh đơ̆ng Kơdră chĕp pơgơ̆r Dơnŏ anĭh vei lăng kon pơlei kơ Pơlei tơm păng hơnĭh jang pơtho pơhrăm. Kơdră chĕp pơgơ̆r Tĕh đak Nguyễn Xuân Phúc hôn bơnê kơ tang kơ kô pơtho Triệu Thị Huệ hlôi tơgop đĭ jơhngơ̆m đon po ăn tơdrong jang pơtho pơhrăm. Kiơ̆ đơ̆ng rŏng ‘nŏh, Kơdră chĕp pơgơ̆r Tĕh đak Nguyễn Xuân Phúc hlôi năm ngôi, hmach chơt hơ iă ăn PGS.TS Lý Hòa, Bơngai jang gơ̆h hơgei. PGS.TS Lý Hòa - mĭnh ‘nu ƀok thây pơtho đei jơhngơ̆m đon ‘lơ̆ng hơ iă, pơm jŭk yŭk trong hơlau ăn rim bơngai pơm kiơ̆, hưch hanh hơmanh bơnê tơdrong jang kơ mĭnh ‘nu bơngai jang khoa hŏk hlôi pơm ăn jơhnơr hŏk tro kiơ̆ yok rok jơ̆ng. 

Tơblơ̆ nơ̆r: Amazưt