VOV4.Bahnar - Lơ̆m ‘măng năm tơmang tĕh đak Việt Nam, pơgê năr 25/8, Kơdră chĕp pơgơ̆r Tĕh đak Nguyễn Xuân Phúc hlôi đei pơma dơnŭh hăm Kơ iĕng Kơdră tơm Hoa Kỳ Kamala Harris. Tơ̆ ‘măng pơma dơnŭh, Kơdră chĕp pơgơ̆r Tĕh đak Nguyễn Xuân Phúc sơkơ̆t hơdăh, Việt Nam lăng kơ jăp jang kiơ̆ trong bơ̆ jang tơbôl kơ jăp păng lui ngêh dĭh băl, tơgop kơtang lơ̆m tơdrong rơngei hiôk hian, sơđơ̆ng păng atŏk tơ iung apŭng plĕnh tĕh.

Kơdră chĕp pơgơ̆r Tĕh đak Nguyễn Xuân Phúc pơma dơnŭh hăm Kơ iĕng Kơdră tơm Hoa Kỳ Kamala Harris

‘Moi kiơ̆ đơ̆ng nŏh, Việt Nam lăng Mi ‘noh mĭnh tĕh đak jang hơdoi tơm hlŏh. Việt Nam ‘mĕh vă atŭm hăm Mi hơnơ̆ng atŏk kơtang tơgoăt tơgoăl jang hơdoi tôm tong, roi năr roi kơtang, atŭm đei iŏk yua ‘moi kiơ̆ yom kiơ̆ tơdrong pơm tơm kơ dĭh, keh kong groi tĕh păng trong chĕp pơgơ̆r. Kơ iĕng kơdră tơm Mi - Kamala Harris hôn bơnê kơtang kơ Việt Nam hlôi hơdrin tang găn jĭ Covid-19 păng sơkơ̆t hơdăh dơ̆ng nơ̆r pơkăp đơ̆ng Mi, tơgŭm djru Việt Nam tơpŭh hŭt jĭ hơbŭh Covid-19. Ƀar ‘nu kơdră chĕp pơgơ̆r drơ̆ng mĭnh nơ̆r atŏk kơtang tơgoăt tơgoăl păng atŏk kơtang jang hơdoi lơ tơdrong. Mă kăl jang hơdoi mŭk drăm mơdro sa, vei lăng sơđơ̆ng tĕh đak, hơmet pơ ‘lơ̆ng đơ̆ng tơdrong tơblăh vang sơ̆, jang pơgang, kmăi kmŏk...

Tơblơ̆ nơ̆r: Amazưt