VOV4.Bahnar - Lơ̆m ‘măng năm Hop akŏm Jơnŭm chĕp pơgơ̆r Liên hợp quốc jăl 76, năr 21/9, Kơdră chĕp pơgơ̆r Tĕh đak Nguyễn Xuân Phúc hlôi đei ƀar ‘măng pơma dơnŭh gĭt kăl hăm ƀok Abdullah Shalid, Kơdră chĕp pơgơ̆r Jơnŭm hăm ƀok Antonio Guterres, Tổng Thư ký Liên hợp quốc. Tơ̆ rim ‘măng pơma dơnŭh, Kơdră chĕp pơgơ̆r Tĕh đak Nguyễn Xuân Phúc sơkơ̆t hơdăh, Việt Nam lăng kơ jăp păng tơgŭm djru hơnăp jang tơm dơnơm kơ Liên hợp quốc lơ̆m tơdrong jang chĭnh trĭ lơ̆m plei tĕh vă tơ jră hăm rim tơdrong long atŭm tôch tĭh tên hrei au păng ‘mĕh vă pơtrŭt kơtang jang hơdoi tôm tong hăm Liên hợp quốc. Kơdră chĕp pơgơ̆r Tĕh đak tơbăt, Việt Nam tŏk bŏk kơrŭn jơhngơ̆m lơ̆m tang găn jĭ hơbŭh tŏk bŏk pơrăm kơtang, lăng tơdrong vei lăng năng tông jơhngơ̆m pran jăng grăng akau kon pơlei ‘nŏh kăl hlŏh, adoi bơnê kơ Tơdrong jang COVAX păng rim hơnĭh jang kơ Liên hợp quốc hlôi tơgŭm djru vaccine, kmăi kmŏk, tơmam drăm jang pơgang păng pơchŏh trong bơ̆ jang tang găn jĭ hơbŭh păng hơmet pơ ‘lơ̆ng đơ̆ng rŏng jĭ hơbŭh, athei  Liên hợp quốc hơnơ̆ng tơgŭm djru Việt Nam lơ̆m khei năr kơnh, mă kălvă tơgŭm djru tơlĕch jang ƀet bơ̆ng vaccine ăn rim răih kon pơlei.

Tơblơ̆ nơ̆r: Amazưt