VOV4.Bahnar - Pơgê brei, năr 26/7, tơ̆ ‘măng hop akŏm mă blŭng, Kuô̆k hô̆i jăl XV, hăm iŏk đei 100% kơdră tang măt vang pơdrơ̆ng nơ̆r đei drơ̆ng nơ̆r, ƀok Nguyễn Xuân Phúc, Kơdră jang lơ̆m Dơnŏ anĭh tơm Chĭnh trĭ jăl XIII, kơdră tang măt Kuôk hô̆i jăl XV hlôi đei jang dơ̆ng kơchư̆k Kơdră chĕp pơgơ̆r Tĕh đak Cộng hòa xã hội chủ nghĩa Việt Nam jăl jang 2021-2026.

Kơdră chĕp pơgơ̆r Tĕh đak Nguyễn Xuân Phúc pơma pơkăp tŏk bơ̆ jang

Lăp đơ̆ng rŏng tơbăt hơdăh pơtôch ‘măng pơdrơ̆ng nơ̆r, Kơdră chĕp pơgơ̆r Tĕh đak Nguyễn Xuân Phúc hlôi pơma pơkăp tŏk bơ̆ jang. Iung pơma tơ̆ pơma pơkăp tŏk bơ̆ jang, ƀok Nguyễn Xuân Phúc pơma tơbăt jơhngơ̆m đon bơnê kơ Kuô̆k hô̆i hlôi pôk tơmơ̆t ƀok jang dơ̆ng Kơdră chĕp pơgơ̆r Tĕh đak; Bơnê kơ Tổng Bí thư Nguyễn Phú Trọng păng rim kơdră chĕp pơgơ̆r hơdrol găh dôm tơdrong tơgop tĭh tên ăn kơ Đảng, Kon pơlei păng tĕh đak. Mă đơ̆ng tơdrong yă kiơ mơmat tat dăh mă hiôk hian, Kơdră chĕp pơgơ̆r Tĕh đak ling lang vei kơ jăp păng atŏk kơtang jơhngơ̆m pran kơ tơgoăt tơgoăl hơdrĕch hơdrung, atŭm hăm dôm tơdrong oei sa ‘lơ̆ng hơ iă sơ̆ ki păng joăt joe ‘lơ̆ng liĕm kơ hơdrĕch hơdrung, kơ yuơ tơdrong atŏk tơ iung pran kơtang, tôm tong păng pran kơ jăp kơ tĕh đak bơ̆n.

Tơblơ̆ nơ̆r: Amazưt