VOV4.Bahnar - Gơmăng năr 2/12 kiơ̆ jơ tơring, Kơdră chĕp pơgơ̆r Tĕh đak Nguyễn Xuân Phúc hăm akăn Ƀok chĕp kơ̆l Khŭl kơdră kơpal Việt Nam hlôi lĕch đơ̆ng tĕh đak Liên bang Nga, pơtôch ‘lơ̆ng hơ iă năm tơmang tĕh đak Liên bang  Nga kiơ̆ nơ̆r krao hơvơn đơ̆ng Ƀok Kơdră tơm Nga Putin. Hăm vă jê̆ 30 tơdrong pơgơ̆r jang đơ̆ng Kơdră chĕp pơgơ̆r Tĕh đak păng lơ tơdrong jang kơ rim hơnĭh tơm, hơnĭh bơ̆ jang, ‘măng năm tơmang đơ̆ng Kơdră chĕp pơgơ̆r Tĕh đak Nguyễn Xuân Phúc hlôi hơ nhăk đei tơdrong jơnei tôch ‘lơ̆ng hơ iă lơ̆m rim tơdrong jang hơdoi ƀar păh tĕh đak, pơtrŭt kơtang hlŏh dơ̆ng tơgoăt tơgoăl jang hơdoi git kăl Việt Nam-Nga. Ƀar ‘nu Kơdră chĕp pơgơ̆r drơ̆ng mĭnh nơ̆r ba tơdrong jang hơdoi mŭk drăm jing tơdrong jang kăl hlŏh lơ̆m tơgoăt tơgoăl Việt Nam -Nga; drơ̆ng mĭnh nơ̆r hơnơ̆ng tơlĕch jang kiơ̆ jơnei Tơdrong tơchơ̆t Mơdro sa hiôk hian ƀar păh Việt Nam păng Jơnŭm atŭm Mŭk drăm Á - Âu, adoi nhen pơjing rơvơn hlŏh dơ̆ng ăn mơdro sa păng tơmơ̆t jên jang dih băl, vă pơjing hơyak pran hlŏh dơ̆ng lơ̆m rim tơdrong jang hơdoi kăl anai. ‘Măng năm tơmang tĕh đak Nga đơ̆ng Kơdră chĕp pơgơ̆r Tĕh đak Nguyễn Xuân Phúc ‘măng mă au atŏk loi dơ̆ng tơgoăt tơgoăl jang hơdoi ƀar tĕh đak tơ ƀô̆h hơdăh hlŏh ‘nŏh nơ̆r Tơchơ̆t atŭm găh Lăng truh Tơgoăt tơgoăl jang hơdoi tôm tong Việt Nam- Nga trŭh sơnăm 2030.

Tơblơ̆ nơ̆r: Amazưt