VOV4.Bahnar - Ƀlep lơ̆m năr tơbăt 96 sơnăm Năr Khŭl chĭh kơtơ̆ng ang kĕch mang Việt Nam (21/6), Kơdră chĕp pơgơ̆r Tĕh đak Nguyễn Xuân Phúc pơtrŭh nơ̆r hmach chơt hơ iă ăn đĭ đăng rim bơngai bơ̆ jang chĭh kơtơ̆ng ang lơ̆m tĕh đak, adoi hôn bơnê dôm bơngai chĭh kơtơ̆ng ang ư̆h kơ ‘nhoen mơmat tat, vang iung jang kơtang lơ̆m tang găn jĭ Covid-19 prăt khei năr au ki.

Kơdră chĕp pơgơ̆r Tĕh đak Nguyễn Xuân Phúc hmach chơt hơ iă hăm rim bơngai chĭh kơtơ̆ng ang sơnăm ‘nglŏ kră

Lơ̆m kơthơ đei nơ̆r pơma: “Ƀlep lơ̆m Năr Khŭl chĭh kơtơ̆ng ang Kĕch mang Việt Nam, ĭnh pôk bơnê păng hôn bơnê kơtang khŭl kang ƀô̆, bơngai chĭh kơtơ̆ng ang păng bơngai koăy phim tơ̆ rim hơnĭh jang chĭh kơtơ̆ng ang lơ̆m tĕh đak khei năr au ki. Gơnơm đơ̆ng bơ̆n hlôi pơm ‘lơ̆ng hlŏh dơ̆ng tơdrong joăy joe kơ chĭh kơtơ̆ng ang Kĕch mang Việt Nam kơ yuơ Kơdră chĕp pơgơ̆r teh đak Hồ Chí Minh pơjing păng pơhrăm ăn”.Hơdrol kơ ‘nŏh, Kơdră chĕp pơgơ̆r Tĕh đak hlôi năm ngôi, hmach chơt hơ iă păng pôk tơmam drăm năn bơngai chĭh kơtang ang păng ŭnh hnam bơngai jang chĭh kơtơ̆ng ang sơnăm ‘lŏ kră jang ‘lơ̆ng; lơ̆m au đei Bơngai jang chih kơtơ̆ng ang Đặng Minh Phương, sơnăm au 93 sơnăm, hlôi đei bơ̆ jang tơ̆ 3 hơnih chĭh kơtơ̆ng ang kơ Đảng ‘nŏh Ƀăo: Cứu quốc Nam Trung Bộ, Cờ Giải phóng păng Nhân Dân. Ƀlep lơ̆m tơbăt 96 sơnăm Khŭl chĭh kơtơ̆ng ang Việt Nam, ‘moi kiơ̆ bơngai chĭh kơtơ̆ng ang Đặng Minh Phương, Kơdră chĕp pơgơ̆r Tĕh đak Nguyễn Xuân Phúc hlôi pơtrŭh nơ̆r hmach chơt hơ iă, apĭnh jet gia pơma dơnŭh pơtrŭh ƀơ̆r đon ăn rim bơngai chĭh kơtơ̆ng ang hlôi đei tơgop gĭt kăl ăn tơdrong atŏk tơ iung kơ khŭl jang kơtơ̆ng ang kĕch mang Việt Nam.

Tơblơ̆ nơ̆r: Amazưt