VOV4.Bahnar - Kơsơ̆ năr 6/12, tơ̆ Hơnĭh bơ̆ jang Kơdră chĕp pơgơ̆r Tĕh đak, Kơdră chĕp pơgơ̆r Tĕh đak Nguyễn Xuân Phúc sơng pơma dơnŭh hăm Kơdră chĕp pơgơ̆r Kuô̆k hô̆i Lào Xay-xổm-phon Phôm-vi-hản ƀlep lơ̆m năr ƀok pơm Kơdră Khŭl kơdră tang măt Kuô̆k hô̆i Lào iung năm tơmang Việt Nam. Tơ̆ jơ sơng, Kơdră chĕp pơgơ̆r Tĕh đak Nguyễn Xuân Phúc hôn bơnê kơtang tơdrong iŏk đei jơnei ‘măng pơma đam ƀar păh Kơdră chĕp pơgơ̆r Kuô̆k hô̆i Lào Xay-xổm-phon Phôm-vi-hản hăm Kơdră chĕp pơgơ̆r Kuô̆k hô̆i Việt Nam Vương Đình Huệ. Vang hơlêm hăm Lào găh dôm tơdrong long hrei au, mă kăl ‘nŏh dôm tơdrong tơnap tap kơ yuơ Covid-19 pơm ăn, Kơdră chĕp pơgơ̆r Tĕh đak Nguyễn Xuân Phúc hôn bơnê kơtang rim hơnĭh bơ̆ jang kơ ƀar tĕh đak hlôi iung jang hơdoi jơnei, kơ jăp tang găn jĭ păng kăl hơnơ̆ng iung jang hơdoi lơ̆m khei năr au kơnh. Kơdră chĕp pơgơ̆r Tĕh đak jei sơkơ̆t hơdăh trong bơ̆ jang đơ̆ng Việt Nam ‘nŏh iung jang păng atŏk kơtang tơgoăt tơgoăl kơ jăp gĭt kăl Việt Nam - Lào. Ƀar tĕh đak ling lang jing bơngai ‘nhŏng ŏh “Găr phe phĕ asong, hla ‘nhot klăh asong dĭh băl”. Kơdră chĕp pơgơ̆r Tĕh đak athei ƀar Đảng, ƀar tĕh đak păng kon pơlei ƀar tĕh đak atŏk kơtang jang hơdoi; iung jang hơdoi hơmet ăn tôm tơdrong ăn ‘Măng tơ ƀơ̆p joăt joe ƀar Dơnŏ anĭh tơm Chĭnh trĭ păng ‘Măng hop akŏm mă 44 Dơnŏ anĭh bơ̆ jang hơdoi Khŭl kơdră chĕp pơgơ̆r Việt Nam – Lào.

Tơblơ̆ nơ̆r: Amazưt