VOV4.Bahnar - Hơnơ̆ng iung năm tơmang tĕh đak Campuchia, pơgê năr 22/12, Kơdră chĕp pơgơ̆r Tĕh đak hlôi năm ngôi păng pơma dơnŭh hăm kang ƀô̆ bơ̆ jang lơ̆m Dơnŏ anĭh tang măt tĕh đak Việt Nam tơ̆ Campuchia, tơ ƀơ̆p bơngai tang măt ăn kon pơlei Việt Nam tơ̆ Campuchia.

Chơt hơ iă đei tơ ƀơ̆p kon pơlei tơ̆ jơ tơ ƀơ̆p mŭh măt, Kơdră chĕp pơgơ̆r Tĕh đak Nguyễn Xuân Phúc pơma tơbăt dơ̆ng lơ̆m khei ‘năr tơnap tap kơ tơdrong jĭ hơbŭh Covid-19, Việt Nam păng Campuchia hlôi đei lơ tơdrong jang tơgŭm dĭh băl. ‘Nau jing jơhngơm đon tôch ‘lơ̆ng hơ iă, hơnơ̆ng tơ ƀô̆h hơdăh lơ̆m tơgoăt tơgoăl joăt joe ‘lơ̆ng liĕm, kơ jăp ‘lơ̆ng đunh đai tai sơnăm ƀar păh tĕh đak păng kon pơlei ƀar tĕh đak. Lơ̆m khei năr kơnh, Kơdră chĕp pơgơ̆r tĕh đak Nguyễn Xuân Phúc athei rim kang ƀô̆, bơngai jang lơ̆m Dơnŏ anĭh tang măt tĕh đak hơnơ̆ng jang ‘lơ̆ng tơdrong jang Đảng, Tĕh đak pơjao, jang kiơ̆ ‘lơ̆ng tơdrong jang vei lăng kon pơlei, tơgŭm tơdrong erĭh sa ăn kon pơlei Việt Nam oei tơ̆ au vă roi năr đei lơ hlŏh dơ̆ng tơdrong jang kơ kon pơlei lăng trŭh pơlei pơla, tơgop tơ iung pơjing pơlei pơla, tĕh đak, lơ̆m au đei tơdrong xek tơlang dôm tơdrong ăn kon pơlei hơdrung Việt oei tơ̆ Campuchia.

Tơblơ̆ nơ̆r: Amazưt