VOV4.Bahnar - Ƀlep lơ̆m năr tơbăt 31 sơnăm Năr apŭng plĕnh tĕh bơngai ‘lŏ kră (1/10), Kơdră chĕp pơgơ̆r Tĕh đak Nguyễn Xuân Phúc ‘nao đei jơ tơ ƀơ̆p mŭh măt Trung ương Khŭl bơngai ‘lŏ kră Việt Nam păng rim bơngai tang măt ăn bơngai ‘lŏ kră.

Rup tơ ƀơ̆p muh măt

Tang măt ăn kơ Đảng, Tĕh đak, Kơdră chĕp pơgơ̆r Tĕh đak Nguyễn Xuân Phúc pơtrŭh ăn rim kang ƀô̆, rim bơngai lơ̆m Khŭl bơngai ‘lŏ kră Việt Nam, đĭ đăng bơngai ‘lŏ kră Việt Nam lơ̆m tĕh đak păng tĕh đak đe jơhngơ̆m đon yom kiơ̆ kơtang, apĭnh jet gia pơma dơnŭh păng nơ̆r hôn bơnê kơtang hlŏh. Lơ̆m khei năr kơnh, Kơdră chĕp pơgơ̆r Tĕh đak athei Khŭl bơngai ‘lŏ kră Việt Nam kăl iung jang hơdoi hăm rim Hơnĭh tơm, hơnĭh bơ̆ jang, tơring tơrang hơnơ̆ng jang kiơ̆ păng pơchŏh trong pơjing rim trong jang, trong tơgŭm djru kơ Đảng, Tĕh đak găh vei lăng năng tông bơngai ‘lŏ kră ‘lơ̆ng hơ iă hlŏh dơ̆ng. Pơma hơdăh, bơngai ‘lŏ kră ‘nŏh jing bơngai tơm lơ̆m ŭnh hnam, Kơdră chĕp pơgơ̆r Tĕh đak athei bơngai ‘lŏ kră hơnơ̆ng hơlen băt găh trong jang tơgŭm djru đơ̆ng Đảng păng tĕh đak; hơnơ̆ng chă tơchĕng hơlen, trŭh hloi hŏk pơhrăm, vă đơ̆ng nŏh pơtho khan ăn jơhnơr mơlô̆h găh tơdrong oei sa ‘lơ̆ng hơ iă, vei kơ jăp tơdrong joăt joe oei sa ‘lơ̆ng liĕm kơ hơdrĕch hơdrung bơ̆n.

Tơblơ̆ nơ̆r: Amazưt