VOV4.Bahnar - Jang kiơ̆ Tơdrong jang pơrô̆ hơvơn bơngai tăh hla hơdrol pôk rơ̆ih Kơdră tang măt Kuôk hô̆i jăl XV păng Jơnŭm vei lăng kon pơlei jăl jang 2021-2026, lơ̆m 2 năr, năr 9 păng 10/5, Kơdră chĕp pơgơ̆r Tĕh đak Nguyễn Xuân Phúc hăm rim bơngai đei hơnăn ăn pôk tơmơ̆t hlôi tơ ƀơ̆p pơma dơnŭh hăm bơngai tăh hla tơ̆ ƀar apŭng Củ Chi hăm Hóc Môn kơ Pơlei tơm Hồ Chí Minh. Pơma tơbăt trong bơ̆ jang kơ dĭh, Kơdră chĕp pơgơ̆r Tĕh đak Nguyễn Xuân Phúc akhan, tơdrong jang mă blŭng kơ rim bơngai đei pôk tơmơ̆t pơm Kơdră tang măt Kuô̆k hô̆i păng Jơnŭm vei lăng kon pơlei ‘nŏh kăl hơnơ̆ng chă mơ̆ng bơngai tăh hla tơroi tơbăt jơhngơ̆m đon hơpơi ‘mĕh vă, tơbăt hơdăh tơtom ăn Kuô̆k hô̆i, Jơnŭm vei lăng kon pơlei păng rim hơnĭh bơ̆ jang vă tơgop tơ iung pơjing tĕh đak păng pơlei tơm Hồ Chí Minh gơ̆h hơgei oei sa ‘lơ̆ng, tơgoăt mĭnh ƀơ̆r đon, vei kơ jăp tơdrong oĕi sa jŏh ayŏ’lơ̆ng hơ iă. Tang măt ăn rim bơngai đei hơnăn ăn pôk tơmơ̆t, Kơdră chĕp pơgơ̆r Tĕh đak Nguyễn Xuân Phúc ‘mĕh vă rim bơngai đei pôk tơmơ̆t kăl vang tơgop vă ƀar apŭng hrôih jing quận găh pơlei tơm. Hăm Củ Chi, Kơdră chĕp pơgơ̆r tĕh đak akhan, rim bơngai đei pôk tơmơ̆t kăl lăng ba kơ jăp tơplĭh ‘nao trong jang atŏk tơ iung, lơ̆m au kăl atŏk tơ iung tĕch mơdro, hơnih kơdrơ̆m rơgŏh ‘lơ̆ng, hơnhăk Củ Chi jing quận jĭh rơgŏh ‘lơ̆ng kơ pơlei tơm Hồ Chí Minh.

Tơblơ̆ nơ̆r: Amazưt