VOV4.Bahnar - Tơ̆ pơlei tơm Hồ Chí Minh, Kơdră chĕp pơgơ̆r Tĕh đak Nguyễn Xuân Phúc ‘nao đei tơ ƀơ̆p pơma dơnŭh hăm bơngai tăh hla apŭng Củ Chi păng Hóc Môn kiơ̆ trong pơgơ̆r trư̆k tuyên, tơroi tơbăt găh tơdrong hơmet ăn ‘măng hop akŏm mă 2 Kuôk hôi jăl XV.

Kơdră chĕp pơgơ̆r Tĕh đak Nguyễn Xuân Phúc pơma dơnŭh hăm bơngai tăh hla pơlei tơm Hồ Chí Minh

Tơ̆ jơ tơ ƀơ̆p, rim bơngai tăh hla pơma tơbăt jơhngơ̆m đon bơnê kơ Đảng, Tĕh đak, rim khŭl, rim bơngai lơ̆m tĕh đak păng oei tơ̆ tĕh đak đe hlôi hlôi lăng ba kơ jăp, chĕp pơgơ̆r pơrô̆ jang, tơgŭm djru pơlei tơm Hồ Chí Minh tang găn jĭ vă tang găn kĕ jĭ nhen hrei au. Kơdră chĕp pơgơ̆r Tĕh đak Nguyễn Xuân Phúc tơbăt, Dơnŏ anĭh tơm Chĭnh trĭ hlôi đei lơ ‘măng hop akŏm vă tơlĕch lơ trong pơrô̆ jang Khŭl kơdră chĕp pơgơ̆r tĕh đak, Dơnŏ anĭh chĕp pơgơ̆r tang găn jĭ hơbŭh, lơ̆m au đei tơdrong jang đơ̆ng “Zero COVID-19” jing erĭh sa sơđơ̆ng ‘lơ̆ng hơ iă hăm jĭ Covid-19. Lơ̆m khei năr kơnh, Kơdră chĕp pơgơ̆r Tĕh đak akhan, vaccine +5k oei jing trong jang kăl hlŏh đơ̆ng ƀô̆h hơdăh tang găn jĭ kơ apŭng plĕnh tĕh păng Việt Nam. Hăm tơdrong pơlei tơm Hồ Chí Minh roi năr roi kĕ vei lăng tang găn jĭ hơbuh, Kơdră chĕp pơgơ̆r Tĕh đak akhan, rim apŭng Củ Chi păng Hóc Mon kăl dăr lăng, xek tơlang hloi rim tơdrong tơhlăk tơhlĭn vă pơjing đei rơvơn hlŏh ăn rim hơnĭh mơdro sa, Hơp tak xah păng kon pơlei hơmet pơ ‘lơ̆ng jang sa, pơjing tơdrong jang păng jang sa iŏk yua kơ jăp, sơđơ̆ng tơdrong erĭh sa tơpôl.

Tơblơ̆ nơ̆r: Amazưt