VOV4.Bahnar - Pơnê năr 18/8, Kơdră chĕp pơgơ̆r Tĕh đak Nguyễn Xuân Phúc pơm tơm jơ bơ̆ jang hăm Kơdră chĕp pơgơ̆r tơm dơnơm kơ dêh char găh tơdrong jang kiơ̆ mŭk drăm-tơpôl. Iung pơma tơ̆ jơ bơ̆ jang, Kơdră chĕp pơgơ̆r tĕh đak Nguyễn Xuân Phúc hôn bơnê kơ Dơnŏ anĭh Đảng, Kơdră chĕp pơgơ̆r păng kon pơlei dêh char Bắc Giang hlôi đei lơ trong jang kơtang, jơnei lơ̆m tang găn jĭ. Kơ yuơ lơ lŏh, đơ̆ng rŏng hlŏh 2 khei kĕ tang găn jĭ, 36 năr au ki Bắc Giang ưh kơ đei măt bơngai ayơ tơpŏh jĭ.

Kơdră chĕp pơgơ̆r Tĕh đak Nguyễn Xuân Phúc bơ̆ jang hăm kơdră tơm dơnơm Bắc Giang

Tơdrong hơmet dơ̆ng jang sa, pơm tơlĕch tĕch mơdro vĭh hơlơ̆k hơ iă nhen so. ‘Nau jing trong jang pran kơtang hlŏh, tơgop lơ̆m iŏk đei jơnei atum lơ̆m tĕh đak păng jing tơdrong kơnăl ‘lơ̆ng hăm lơ tơring anai lơ̆m dêh char. Mă hơdăh, dêh char hlôi tang găn kĕ jĭ hơbŭh pơrăm lơ̆m 4 hơnĭh jang kmăi kmŏk tĭh. Tŏk bŏk lơ̆m khei ‘năr jĭ hơbŭh, Bắc Giang oei pơgơ̆r jơnei ‘măng Pôk rơ̆ih Kơdră tang măt Kuô̆k hô̆i păng Jơnŭm vei lăng kon pơlei. Atŭm hăm ‘nŏh. Dêh char hlôi iŏk đei jơnei hơ iă găh jang mŭk drăm nhen tĕch mơdro tơ̆ tĕh đak đe, thuê̆ ăn hơnĭh mong jên jang tĕh đak.Ƀlep lơ̆m jơ ‘năr au, tang măt ăn kơdră chĕp pơgơ̆r Đảng, Tĕh đak, Kơdră chĕp pơgơ̆r Tĕh đak Nguyễn Xuân Phúc hlôi pôk ăn Mê đai jang pran kơtang dơ̆ng mă Pêng ăn Dơnŏ anĭh Đảng, Khŭl kơdră chĕp pơgơ̆r păng kon pơlei dêh char Bắc Giang găh dôm tơdrong jang jơnei lơ̆m tang găn jĭ Covid-19 pơrăm.

Tơblơ̆ nơ̆r: Amazưt