VOV4.Băhnar - Kơdră chĕp pơgơ̆r Tĕh đak Nguyễn Xuân Phúc hlôi pơtrŭh kơthơ ăn Thủ tướng Nhật Bản Suga Yoshihide vă tơbăt jơhngơ̆m mach chơt hơ iă găh tơdrong pơgơ̆r Đă ƀŏng lŏng tơplŏng kơdau Apŭng plĕnh tĕh Olympic păng Paralympic Tokyo 2020 hlôi pơgơ̆r gơmăng năr 23/7. Lơ̆m kơthơ, Kơdră chĕp pơgơ̆r Tĕh đak tơbăt jơhngơ̆m đon chơt hơ iă ăn kơ Thủ tướng ‘mêm kơ eng, bơngai boăl joăt kơ kon pơlei Việt Nam, hăm jơhngơ̆m đon ‘lơ̆ng hơ iă păng nơ̆r hmach chơt hơ iă kơtang hăm tơdrong pơgơ̆r Đă ƀŏng lŏng tơplŏng kơdau Olympic păng Paralympic Tokyo 2020 - tơdrong pơgơ̆r đă ƀŏng lŏng tơplŏng kơdau tĭh tên đei gô chang păng dreng lăng kơ jăp tơ̆ Việt Nam păng lơ̆m plei tĕh. Kơdră chĕp pơgơ̆r Tĕh đak Nguyễn Xuân Phúc hmach ăn Đă ƀŏng lŏng tơplŏng kơdau Olympic, Paralympic Tokyo 2020 jơnei keh kong ‘lơ̆ng liĕm. Tơhnit ŭnh Olympic khơ̆ng bơ blông tơ̆ Tokyo ‘nŏh jing pơm hơtŏk jơhngơ̆m ranh hăm dôm bơngai hưch hanh hăm đă ƀŏng lŏng tơplŏng kơdau găh tơdrong nuih mơng, jơhngơ̆m pran kơ kon bơngai tơ̆ hơnăp jĭ hơbŭh lơ̆m plei tĕh, adoi jing tơbăt ăn tơdrong gĭt kăl jơhngơ̆m đon nuih mơng Nhật Bản - mĭnh hơdrung đei jơhngơ̆m đon pran kơtang, mĭnh tĕh đak atŏk tơ iung pơdrŏng kơtang lơ̆m plei tĕh păng jing Tĕh đak jang hơdoi gĭt kăl tôm tơdrong kơ Việt Nam.

Tơblơ̆ nơ̆r: Amazưt