VOV4.Bahnar - Ƀlep lơ̆m năr Pơm lêh hop akŏm ‘măng mă blŭng Jơnŭm Pơjing tơdrong jang Tĕh đak (VINEN), Kơdră chĕp pơgơ̆r Tĕh đak Nguyễn Xuân Phúc hlôi pơtrŭh kơthơ hmach chơt hơ iă ăn Pơm lê̆h hop akŏm ‘măng mă blŭng Jơnŭm Pơjing tơdrong jang Tĕh đak. Kơdră chĕp pơgơ̆r Tĕh đak Nguyễn Xuân Phúc pơma hơdăh, pơtrŭt kơtang Pơjing tơdrong jang jing mĭnh lơ̆m dôm tơdrong iŏk đei gĭt kăl hlŏh lơ̆m ‘măng tơplĭh ‘nao găh jang mŭk drăm tơ̆ Việt Nam. Kơdră chĕp pơgơ̆r Tĕh đak tơbăt, 5 sơnăm au ki, pơ̆ih blŭng jăl jang 2016 -2021, Khŭl kơdră chĕp pơgơ̆r Tĕh đak hlôi tơchơ̆t sơnăm 2016 ‘nŏh sơnăm Tĕh đak Pơjing tơdrong jang. Đơ̆ng mă nŏh, tơdrong pơjing tơdrong jang đei lang să, tơdrong tơmơ̆t jên jang mơdro sa đei hơmet pơ ‘lơ̆ng, hlŏh 100.000 hơnĭh mơdro sa ‘nao đei pơjing păng trŭh dang ei lơ̆m tĕh đak bơ̆n hlôi dei trŭh 800.000 hơnĭh mơdro sa tŏk bŏk bơ̆ jang. Kơdră chĕp pơgơ̆r Tĕh đak hơpơi ‘mĕh vă Jơnŭm Pơjing tơdrong jang Tĕh đak gô tơpă jing gơng tơrŏh klŏh klĕch iŏk đei jơnei tơpôl pơjing tơdrong jang, tơgop lơ̆m pơjing đei, tơgŭm djru, pơjing đei twodrong hơpơi ‘mĕh vă pơjing tơdrong jang tơ̆ Việt Nam.

Tơblơ̆ nơ̆r: Amazưt