VOV4.Bahnar - Pơgê năr 23/8, Pơm lêh hop akŏm Jơnŭm nghĭ viên rim tĕh đak ASEAN ‘măng mă 42 (AIPA-42) hăm hơnăn “Atŏk tơ iung tơgoăt tơgoăl jang hơdoi nghĭ viên lơ̆m bơ̆ jang kih thuơ̆t sô̆ pơ đĭ yak trŭh tơpôl ASEAN sơnăm 2025” hlôi đei pơgơ̆r blŭng a kơ yuơ Kơdră chĕp pơgơ̆r AIPA, Kơdră chĕp pơgơ̆r Jơnŭm pơjing Khôi luơ̆t Brunei Darussalam Pehin Dato Abdul Rahman Taib pơm tơm hăm pơgơ̆r hop akŏm trư̆k tuyên.

Khŭl kơdră chĕp pơgơ̆r Kuô̆k hô̆i Việt Nam kơ yuơ Kơdră chĕp pơgơ̆r Kuô̆k hô̆i Vương Đình Huệ pơm kơdră khŭl vang hop akŏm AIPA-42 tơ̆ hơnĭh pơdăh hop akŏm Hà Nội, Việt Nam. Kiơ̆ trong bơ̆ jang, găh pơgê đei pơgơ̆r hop akŏm đĭ đăng hăm lơ tơdrong kăl. Tơ̆ kơsơ̆, Kơdră chĕp pơgơ̆r Kuô̆k hô̆i Vương Đình Huệ đei nơ̆r pơma gĭt kăl, akŏm lăng hơlen dôm tơdrong lơ̆m apŭng plĕnh tĕh, tơring, đơ̆ng nŏh atŏk kơtang hơnăp jang hơdoi lơ pang păng tơdrong tơgoăt tơgoăl kơ ASEAN; hôn bơnê dôm tơdrong hơdrin đơ̆ng ASEAN păng rim tĕh đak lơ̆m khŭl lơ̆m tơdrong jang tang găn jĭ Covid-19; sơkơ̆t hơdăh tơdrong hơdrin đơ̆ng Việt Nam lơ̆m bơ̆ jang tang găn jĭ Covid-19 păng trong jang kơ Việt Nam găh jang hơdoi vaccine.

Tơblơ̆ nơ̆r: Amazưt