VOV4.Bahnar - Pơgê năr 10/1, Kơdră chĕp pơgơ̆r Tĕh đak hlôi sơng pơma dơnŭh hăm Đại tướng Vilay Lakhamphong, Kơdră jang lơ̆m Dơnŏ anĭh tơm Chĭnh trĭ, Kơdră chĕp pơgơ̆r Dơnŏ anĭh tơm Kŏng ang Lào tŏk bŏk năm tơmang, bơ̆ jang tơ̆ Việt Nam.

Kơdră chĕp pơgơ̆r Tĕh đak Nguyễn Xuân Phúc sơng pơma dơnŭh hăm Kơdră chĕp pơgơ̆r Kŏng ang Lào Vilay Lakhamphong

Tang măt ăn Kơdră chĕp pơgơ̆r Đảng, tĕh đak Việt Nam, Kơdră chĕp pơgơ̆r Tĕh đak Nguyễn Xuân Phúc hmach chơt hơ iă kơ ƀok Vilay Lakhamphong đei pôk tơmơ̆t jang lơ̆m Dơnŏ anĭh tơm Chĭnh trĭ, adoi jing Kơdră chĕp pơgơ̆r Dơnŏ anĭh tơm Kŏng ang mă blŭng lơ̆m kơchư̆k Đại tướng Kŏng ang kon pơlei Lào. Kơdră chĕp pơgơ̆r tĕh đak ‘mĕh vă Dơnŏ anĭh tơm Kŏng ang ƀar tĕh đak hơnơ̆ng jang kiơ̆ tơdrong joăt, atŏk kơtang jang hơdoi kơ jăp, kơtang, mĭnh păh hơmet pơ ‘lơ̆ng rim tơdrong kăl, adoi jang hơdoi lơ̆m dôm tơdrong hơdăh nhen tang găn pơm yoch mạng, kmăi kmŏk; tang găn yoch ma tuý. Kơdră chĕp pơgơ̆r Dơnŏ anĭh tơm Kŏng ang Lào hôn bơnê tơdrong tơgum djru gĭt kăl đơ̆ng Đảng, tĕh đak păng Dơnŏ anĭh tơm Kŏng ang Việt Nam ling lang yak hơdoi tơgŭm djru Lào, mă kăl lơ̆m dôm khei ‘năr tơnap tap hlŏh. 

Tơblơ̆ nơ̆r: Amazưt