VOV4.Bahnar - Kơsơ̆ năr 21/6, tơ̆ Hơnĭh bơ̆ jang Kơdră chĕp pơgơ̆r Tĕh đak, Kơdră chĕp pơgơ̆r Tĕh đak Nguyễn Xuân Phúc sơng pơma dơnŭh hăm Kơdră jang tơbôl Singapore Vivian Balakrishnan năm kŭh ka hla bat lơ̆m ‘măng iung năm tơmang Việt Nam đơ̆ng năr 20-23/6.

Tơ̆ jơ sơng, Kơdră chĕp pơgơ̆r tĕh đak Nguyễn Xuân Phúc hơlen tơdrong tơgoăt tơgoăl jang hơdoi ƀar păh Việt Nam păng Singapore tŏk bŏk atŏk tơ iung roi năr roi kơtang păng jơnei. Singapore ling lang jing mĭnh lơ̆m dôm tĕh đak jang hơdoi tơm; mă kăl đơ̆ng blŭng sơnăm 2020 trŭh dang ei hlôi jing tĕh đak dơ̆ng hơlau lơ̆m 70 tĕh đak tơmơ̆t jên jang lơ̆m Việt Nam; trong jang Hơnĭh jang kmăi kmŏk Việt Nam - Singapore tơgop hơnhăk đei iŏk yua kơ jăp mŭk drăm tơpôl ‘lơ̆ng hơ iă tơ̆ Việt Nam. Găh tơdrong Biển Đông, Kơdră jang tơbôl Singapore sơkơ̆t hơdăh lăng kăl tơdrong vei lăng rơngei hiôk hian, sơđơ̆ng dơ̆ng kơ jăp, duk kơdau păng gre păr chă păr hiôk hian tơ̆ Biển Đông, vei lăng sơđơ̆ng ‘moi kiơ̆ khôi luơ̆t joăt joe, lơ̆m au đei Tơdrong pơkăp Khôi luơ̆t đak dơsĭ 1982.

Tơblơ̆ nơ̆r: Amazưt