VOV4.Bahnar - Pơgê năr 8/12, Dêh char Hà Giang pơgơ̆r Pơm lêh tơbăt 130 sơnăm năr pơjing dêh char (20/8/1891 – 20/8/2021), 30 sơnăm pơjing hơlơ̆k dơ̆ng dêh char păng 60 sơnăm Ƀok Hô năm tơmang Hà Giang. Kơdră chĕp pơgơ̆r Tĕh đak Nguyễn Xuân Phúc vang năm pơm lêh tơbăt hlôi sơkơ̆t hơdăh, tơring tĕh Hà Giang jing groi tĕh gĭt kăl hlŏh, jing tơring sơlam tĕh đak tơm a kơ tĕh đak. Jơhngơ̆m đon kơ kon pơlei Hà Giang jei jing jơhngơm đon kơ hơdrĕch hơdrung Việt Nam. Hăm trong atŏk tơ iung mă Hà Giang tơlĕch ăn tơ̆ Pơm lêh Hop akŏm Đảng dêh char ‘măng mă 17, ‘nŏh tơ iung pơjing Hà Giang jing dêh char atŏk tơ iung găh tơmang pơ hiơ̆, mơdro sa, tĕch mơdro păng chŏh jang sa pơm tơlĕch tơmam drăm; trŭh sơnăm 2030’nŏh jing dêh char đei mŭk drăm - tơpôl pơdrŏng lơ̆m tơring tơmăn găh Tu; trŭh sơnăm 2045 jing dêh char đei mŭk drăm -tơpôl đei ƀô̆h lơ̆m tĕh đak, Kơdră chĕp pơgơ̆r Tĕh đak Nguyễn Xuân Phúc athei: Dêh char kăl hơnơ̆ng tơchă trong iung jang păng atŏk tơ iung mŭk drăm hle ‘moi kiơ̆ lơ̆m atok tơ iung dôm tơdrong mă dêh char đei; tơlĕch jang kơtang rim trong jang tơgŭm djru ăn erĭh sa, jang kiơ̆ trong jang tơgŭm djru tơ jur dơnŭh, atŏk kơtang pơtho pơhrăm, vei lăng jang pơgang, pơtruh dôm tơdrong đei pơ yoa ăn kon pơlei mă ‘lơ̆ng.

Tơblơ̆ nơ̆r: Amazưt