VOV4.Bahnar - Năr 17/6, Kơdră chĕp pơgơ̆r Radiô Nơ̆r Pơma Việt Nam Đỗ Tiến Sỹ hlôi đei tơ ƀơ̆p trư̆k tuyên hăm Tổng thư ký Jơnŭm khŭl rapor, pơdăh Tivi Châu Á-Thái Bình Dương (ABU) Javad Mottaghi. Tơ̆ jơ tơ ƀơ̆p, Tổng thư ký ABU Javad Mottaghi akhan, hăm đei iŏk bơ̆ jang lơ kơchư̆k, băt tôm tong, Kơdră chĕp pơgơ̆r Đỗ Tiến Sỹ gô hơnhăk Radiô Nơ̆r Pơma Việt Nam atŏk tơ iung hlŏh dơ̆ng lơ̆m khei năr kơnh. Ƀok Mottaghi tơbăt, hăm kơchư̆k jang Tổng thư ký kơ ABU, ƀok hlôi đei lơ tơdrong jang hơdoi hăm Radiô Nơ̆r Pơma Việt Nam lơ̆m dôm sơnăm au ki păng ‘mĕh vă đei rơvơn bơ̆ jang păng jang hơdoi hăm Kơdră chĕp pơgơ̆r dang ei Đỗ Tiến Sỹ. Kơdră chĕp pơgơ̆r Radiô Nơ̆r Pơma Việt Nam Đỗ Tiến Sỹ sơkơ̆t hơdăh, Radiô Nơ̆r Pơma Việt Nam ling lang jing bơngai lơ̆m khŭl hơdrin đĭ jơhngơ̆m bơ̆ jang atŭm hăm ABU vă tơgop hơnhăk  ABU roi năr roi atŏk tơ iung hlŏh dơ̆ng.

Tơblơ̆ nơ̆r: Amazưt