VOV4.Bahnar - Yak trŭh tơbăt 74 sơnăm Năr bơngai rơka, lôch dŏng tĕh đak, năr 27/7, kơsơ̆ năr 19/7, Dơnŏ anĭh tơm vei lăng Tơdrong jang-Bơngai rơka păng Tơpôl Đào Ngọc Dung atŭm hăm khŭl bơ̆ jang kơ Dơnŏ anĭh tơm au hlôi năm ngôi păng pôk tơmam drăm ăn mĭnh ƀar ŭnh hnam đei iŏk yua ăn tĕh đak oei tơ̆ Hà Nội. Kơdră chĕp pơgơ̆r Đào Ngọc Dung atŭm hăm khŭl bơ̆ jang hlôi năm ngôi păng pôk tơmam drăm ăn 3 ŭnh hnam đei iŏk yua ăn tĕh đak oei lơ̆m pơlei tơm Hà Nội ‘nŏh: Ŭnh hnam ƀok Phạm Đình Thi, bơngai rơka dŏng tĕh đak 81%; ŭnh hnam yă Đỗ Thị Hành ‘nŏh akăn bơngai lôch dŏng tĕh đak Nguyễn Văn Thuyết jei oei lơ̆m kuân Long Biên păng ŭnh hnam ƀok Nguyễn Tường Vĩnh, bơngai rơka dŏng tĕh đak 81% oei lơ̆m kuân Ba Đình. Năm ngôi hăm rim ŭnh hnam bơngai đei iŏk yua ăn tĕh đak, Kơdră chĕp pơgơ̆r Dơnŏ anĭh tơm vei lăng Tơdrong jang-Bơngai rơka păng Tơpôl Đào Ngọc Dung pơma tơbăt jơhngơ̆m đon hôn bơnê kơtang dôm tơdrong tơgop păng hiong răm tĭh tên đơ̆ng rim ŭnh hnam đei iŏk yua ăn tĕh đak, adoi hơpơi ‘mĕh vă rim ŭnh hnam hơnơ̆ng kiơ̆ yok rok jơ̆ng trong bơ̆ jang joăt joe nuih mơng kơ kĕch mang, hơdrin yak hlŏh tơnap tap, jing dôm bơngai pơm jŭk yŭk trong hơlau ăn kôn mon kon sau hŏk pơhrăm păng pơm kiơ̆, hơdrin jang sa, đơ̆ng nŏh tơgop ăn atŏk tơ iung pơlei pơla, tĕh đak.

Tơblơ̆ nơ̆r: Amazưt