VOV4.Bahnar - Kơsơ̆ năr 28/6, Khŭl tang măt kơdră kơpal vei lăng sơđơ̆ng Việt Nam kơ yuơ Đại tướng Tô Lâm, Kơdră chĕp pơgơ̆r Dơnŏ anĭh tơm Kŏng ang pơm Kơdră khŭl hlôi vang năm Hop akŏm khŭl kơdră kơpal Khŭl rim tĕh đak Đông Nam Á (ASEAN) - Nga ‘măng mă blŭng pơgơ̆r kiơ̆ trư̆k tuyên. Iung pơma tơ̆ Hop akŏm, ƀok Tô Lâm pơma hơdăh, ‘nau jing tơdrong pơgơ̆r tôch gĭt kăl, vă pơtrŭt kơtang păng pơm kơtang hlŏh dơ̆ng tơgoăt tơgoăl Jang hơdoi gĭt kăl ASEAN-Nga; pơma hơdăh kăl atŏk kơtang hơnăp jang vă pơtrŭt trong tơchăr au đei tơlĕch jang kơtang păng tơpă hlŏh, drơ̆ng iung jang hơdoi, tơbăt dĭh băl trong jang hơ iă hăm rim tĕh đak ASEAN păng Nga vă atŭm dĭh băl atŏk kơtang kĕ xek tơlang rim tơdrong atŭm. Ƀok Tô Lâm athei, khei năr kơnh, rim tĕh đak lơ̆m tơring atŏk kơtang rim trong jang pơjing jơhngơ̆m đon lui kiơ̆, pơjing rim trong pơma dơnŭh hơ iă vă chă tơbăt dĭl băl trong bơ̆ jang, tơtom hơmet pơ ‘lơ̆ng rim tơdrong ư̆h kơ lăp dĭh băl, pơtrŭt kơtang jang hơdoi atŭm đei iŏk yua, atŏk tơ iung mŭk drăm- tơpôl kơ jăp ‘lơ̆ng. Tơ̆ Hop akŏm, rim kơdră tang măt hlôi pơma dơnŭh, tơbăt rim trong jang kăl vă vei kơ jăp tơdrong sơđơ̆ng chĭnh trĭ, sơđơ̆ng dơ̆ng kơ jăp tơring ASEAN păng să hlŏh dơ̆ng ‘noh tơring châu Á – Thái Bình Dương.

Tơblơ̆ nơ̆r: Amazưt