VOV4.Bahnar - Kơdră jang tơbôl Bùi Thanh Sơn hlôi krao điên thoăi pơma đam hăm Kơdră jang tơbôl Singapore Vivian Balakrishnan. Kơdră jang tơbôl Bùi Thanh Sơn hôn bơnê kơtang tơdrong tơgŭm djru đơ̆ng Singapore ăn kơ Việt Nam, mă kăl ‘nŏh pơkăp tơgŭm djru rim tơmam drăm jang pơgang vă tang găn jĭ Covid-19, lơ̆m au đei tơdrong Hơnĭh mong jên Temasek kơ Singapore hlôi pôk ăn Việt Nam 16 tŏ kmăi dui jơhngơ̆m păng kơ hrĕng rơbau tơmam drăm tơgŭm ăn jang pơgang; lăng ‘nau jing tơ ƀô̆h hơdăh ăn tơgoăt tơgoăl dĭh băl kơ jăp păng Jang hơdoi gĭt kăl ƀar păh tĕh đak. Chă pơma dơnŭh găh tơdrong tơgoăt tơgoăl dĭh băl, ƀar ‘nu Kơdră jang tơbôl drơ̆ng mĭnh nơ̆r pơtrŭt kơtang hlŏh dơ̆ng rim tơdrong jang hơdoi chĭnh trĭ, muk drăm, mơdro sa, tơmơ̆t jên jang, pơtho pơhrăm vă hơnơ̆ng hơmet pơ ‘lơ̆ng păng atŏk tơ iung tơgoăt tơgoăl Jang hơdoi gĭt kăl Việt Nam - Singapore.

Tơblơ̆ nơ̆r: Amazưt