VOV4.Bahnar  – Pơgê năr 30/6, tơ̆ plei tơm Buôn Ma Thuột, dêh char Đăk Lăk pơgơ̆r 'măng hop akŏm mă mônh, Hô̆i đŏng kon pơlei jăl 10, jăl jang 2021-2026. Ƀok Kơdră Kuôk hô̆i Vương Đình Huệ năm akŏm pơtơm.

          Tơ̆ 'măng hop akŏm âu, Anih pơgơ̆r pôk rơih dêh char Đăk Lăk hlôi xơkơ̆t hơnăn 75 jang tang măt lơ̆m Hô̆i đŏng kon pơlei dêh char jăl 10, jăl jang 2021-2026; atŭm hăm noh pôk ƀok Y Vinh Tơr,  Phŏ Kơdră Hô̆i đŏng kon pơlei dêh char Đăk Lăk jăl 9 tŏk jang Kơdră Hô̆i đŏng kon pơlei dêh char hăm kơsô̆ kơphĭu drơ̆ng đei 98,66%. Pôk ƀok Phạm Ngọc Nghị, Kơdră Anih vei lăng kon pơlei dêh char jăl jang 2016-2021 jang dơ̆ng Kơdră Anih vei lăng kon pơlei dêh char Đăk Lăk jăl jang 2021-2026 hăm kơsô̆ kơphĭu drơ̆ng 100%.

          Pơma ăh hop akŏm, Kơdră Kuôk hô̆i Vương Đình Huệ ră hơdăh, jang tang măt lơ̆m Hô̆i đŏng kon pơlei athei yuk trong hơlâu, khĭn kơchĕng, khĭn iŏk jang, chiu pŭ xơnong kơ bơngai tang măt ăn kon pơlei; mă hăt noh athei hơbĕch gơh rơgei, tơplih 'nao lơ̆m trong pơm jang, hơlen, apinh pơma dơnuh hăm kon pơlei, vang tơgop nơ̆r lơ̆m chih akŏm khôi luơ̆t. Kơdră Kuôk hô̆i Vương Đình Huệ pơkăl, lơ̆m jăl jang 2021-2026, Hô̆i đŏng kon pơlei dêh char Đăk Lăk jăl 10 kăl pơtoi tơplih 'nao pran hloh, hơtŏk pơ 'lơ̆ng păng tơnăp hloh vă hơ 'nhăk Đăk Lăk jing minh lơ̆m dôm anih hơtŏk găh mŭk drăm pran hloh, pơlan xă lơ̆m tơring jang mŭk drăm kơ  Tây Nguyên.

Lan chih păng pơre nơ̆r