VOV4.Bahnar – Xơng iŏk nơ̆r hơvơn đơ̆ng Kơdră Ngĭ viê̆n châu Âu (EP) David Sassol, Kơdră Kuôk hô̆i Vương Đình Huệ păng khul kơpal kơ Kuôk hô̆i Việt Nam hlôi truh cham gre păr Melsbroek, Brussel, teh đak Bỉ, năm tơmang păng bơ̆ jang hăm Ngĭ viê̆n châu Âu (EP), Jơnŭm jang châu Âu (EU) đơ̆ng năr 8-9/9. Lơ̆m 'măng năm tơmang mă âu truh teh đak Bỉ, Kơdră Kuôk hô̆i Vương Đình Huệ đei pơma đam hăm Kơdră Anih jang atŭm châu Âu, pơma đam hăm Kơdră Ngĭ viê̆n châu Âu, Kơdră Anih jang châu Âu, tang măt ăn dôm ngĭ sih châu Âu lơ̆m dôm Anih jang kăp gĭt kơ Ngĭ viê̆n châu Âu nhen, Anih jang găh tĕch pơdro apŭng plenh teh, âu jing Anih dơnơm, hơtŏk tơdrong pơm kiơ̆ pơkăp păng rim khul ngĭ sih jang tơbôl hăm Asean adoi nhen hăm Việt Nam. Mă kăl, Kuôk hô̆i Việt Nam gô atŭm hăm Anih jang tĕch pơdro apŭng plenh teh kơ Ngĭ viê̆n châu Âu pơđăp, pơjing trong jang hadoi ngĭ viê̆n vă hơtŏk tơdrong pơm kiơ̆ Tơchơ̆t.

Adrol kơ noh, lơ̆m 'măng năm Hop akŏm dôm ƀok Kơdră Kuôk hô̆i Apŭng plenh teh pơgơ̆r tơ̆ teh đak Áo, Kơdră Kuôk hô̆i Vương Đình Huệ hlôi đei 3 ƀai đŏk kăp gĭt tơbang lơ̆m dôm tơdrong hop akŏm; atŭm hăm noh tơjrâ̆m ƀar păh hăm 13 kơdră kơpal kơ Kuôk hô̆i/Ngĭ viê̆n dôm teh đak... Mă kăl noh hlôi xơng iŏk kơsô̆ vaccine, tơmam drăm y tê̆ 'măn ăn tơdrong jang tang găn păng tơjră pơrang jĭ Covid-19 đơ̆ng dôm anih jang mŭk drăm, jơnŭm tơpôl, tơ 'ngla bơngai jang tơ̆ teh đak Áo.

Lan chih păng pơre nơ̆r