VOV4.Bahnar – Kơsơ̆ măng 'năr brei (7/7), tơ̆ Hnam Kuôk hô̆i, Kơdră Kuôk hô̆i Vương Đình Huệ hlôi pơma đam trư̆k tuyê̆n hăm Kơdră Hă viê̆n teh đak Marocco Habid El Malki.

          Lơ̆m jơ pơma đam, ƀar ƀok kơdră ră hơdăh, Việt Nam păng marocco đei tơbôl juăt jue 'lơ̆ng rŏ, ƀar teh đak mă ataih băl găh hơgăt teh mă lei đei lơ tơdrong nhen băl găh hnưr erih păg tơdrong hơtŏk tơ iung, atŭm jing teh đak tŏk bŏk oei hơtŏk tơ iung, vang jang lơ̆m Jơnŭm ưh đei tơguăt păng Jơnŭm dôm teh đak pơma nơ̆r Phlăng. 'Nâu jing tơdrong hiôk ăn hơtŏk tơbôl ƀar păh lơ̆m dôm tơdrong jang lơ̆m khei năr truh. Ƀar păh pơtoi chĕp vei trong jang kơjăp vă jang hadoi lơ̆m hop akŏm lơ teh đak nhen IPU, APF păng dôm tơdrong jang hăm ngĭ viê̆n lơ teh đak nai; tơgŭm đon pơkăp dih băl găh dôm tơdrong đei ƀôh lơ̆m tơring păng lơ̆m apŭng plenh teh mă ƀar păh atŭm tơrĕk. Atŭm chă hơlen tơdrong pơm kiơ̆ tơchơ̆t pơdrơ̆ng hlôi đei kĭ đơ̆ng Khul kơpal teh đak păng dôm Anih jang tơm kơ 2 teh đak, vă dôm tơchơ̆t âu đei tơlĕch jang drơ̆ng minh, pơyua tơnăp hloh, tơgăl hăm tơdrong tơbôl chĭnh trĭ 'lơ̆ng rŏ kơ 2 teh đak.

Lan chih păng pơre nơ̆r