VOV4.Bahnar – Pơgê năr 17/5/2021, tơ̆ Hnam Kuôk hô̆i, Kơdră Kuôk hô̆i Vương Đình Huệ bơ̆ jang hăm Jơnŭm jang kăl kơ kon pơlei lơ̆m Anih juăt jang kơ Kuôk hô̆i.

Kơdră Kuôk hô̆i Vương Đình Huệ ră hơdăh, tơdrong jang kăl kơ kon pơlei hơdăh noh xơng pơma dơnuh hăm kon pơlei lơ̆m khei năr âu ki hlôi tơgŭm ăn Anih juăt jang kơ Kuôk hô̆i pơm kiơ̆ xơnong hơlen, xek tơlang dôm tơdrong tơkêng, pơtruh đơ̆ng kon pơlei đei jang tơnăp, hơtŏk xơnong jang tơblang kơ dôm anih jang, mă hăt noh kơdră kơpal hăm tơdrong tơkêng tơhlâu đơ̆ng kon pơlei, đei kon pơlei drơ̆ng lăp; tơgop lơ̆m tơdrong đei jơnei atŭm kơ Kuôk hô̆i jăl 14. Lơ̆m khei năr truh, Jơnŭm jang kăl kơ kon pơlei athei xơkơ̆t hơdăh xơnong jang tơm, mă kăl noh đơ̆ng dang ei truh ăh ‘năr pôk rơih bơngai jang tang măt ăn Kuôk hô̆i jăl 15 păng jang tang măt lơ̆m Hô̆i đŏng kon pơlei dôm jăl jang đơ̆ng xơnăm 2021-2026. Kơdră Kuôk hô̆i Vương Đình Huệ ră hơdăh, Jơnŭm jang kăl kơ kon pơlei athei chih akŏm tơdrong jang tơm, hơtŏk tơdrong rơgei, jang đei jơnei hloh lơ̆m jăl jang truh, pơtruh ăn Kuôk hô̆i jăl 15 vă tơmơ̆t lơ̆m tơdrong pơm jang kơ Đảng đoan Kuôk hô̆i kiơ̆ tơdrong chĕp vei đơ̆ng tơdrong jang hlôi đei jơnei.

Lan chih păng pơre nơ̆r