VOV4.Bahnar  – Ƀơ̆t tơbăt 20 xơnăm 'Năr Unh hnam Việt Nam (28/6), Kơdră teh đak bơ̆n Nguyễn Xuân Phúc hlôi pơtruh kơthơ thơ thâu hăm tôm unh hnam tơ̆ Việt Nam, lơ̆m noh hơvơn rim unh hnam kăl kơyuơ kơ minh Việt Nam hơtŏk pran lơ̆m kơpal teh păng gơh đei iŏk xô̆ jơnap. Kơtho đei chih thoi âu: “Lơ̆m khei năr pơrang jĭ Covid-19 tŏk bŏk hơbuh hli tơ̆ teh đak bơ̆n, lơ kang ƀô̆ thây pơgang, đe linh hlôi ưh pơngơ̆t kơ tơdrong hli hlơt mă năm jang tơ̆ tơring hơbuh hli. Kơdih unh hnam hơnơ̆ng jing anih gơnơm găh đon bơnôh, đon lui, hơlêm đe xư yak hloh tơnap tap keh đang tơnăp xơnong jang po. Lơ unh hnam hlôi tơgŭm tơmam drăm, đon bơnôh, yuk trong hơlâu, hơlêm 'nhŏng oh po jang kơjăp trong pơkăp, atŭm jơhngơ̆m hăm Đảng, Teh đak păng tôm anih jang chĭnh trĭ lơ̆m chă tang găn păng tơjră pơrang jĭ vă Việt Nam jing minh anih hơdăh ang đei bôl boăl apŭng plenh teh pôk bơnê. Inh hmach bơnê kơ dôm jăl jang, rim tơring, rim anih jang, rim tơ 'ngla lơ̆m jâ̆p teh đak, kon pơlei Việt Nam bơ̆n tơ̆ teh đak đe hlôi đei lơ tơdrong jang kăp gĭt, tơgop pơjing unh hnam Việt Nam jơnap, gơh rơgei, hơtŏk tơ iung kơjăp”.

Lan chih păng pơre nơ̆r