VOV4.Bahnar – Kơsơ̆ năr 12/8, tơ̆ Anih jang kơpal, ƀok kơdră teh đak bơ̆n Nguyễn Xuân Phúc hlôi xơng pơma dơnuh hăm ƀok Kamal Malhotra, Kơdră jang tang măt ăn Liên hơp kuôk tơ̆ Việt Nam, truh hmach tơklăh ti adrol kơ pơtôch jăl jang. Kơdră teh đak bơ̆n thơ thâu hơ iă hăm ƀok Kơdră tang măt hlôi keh đang tơnăp jăl jang po tơ̆ Việt Nam. Kơdră teh đak xơkơ̆t Việt Nam tơgĭt tơdrong tơgŭm, yak hadoi păng jang hadoi kăp gĭt đơ̆ng anih jang Liên hơp kuôk hăm Việt Nam lơ̆m hloh 40 xơnăm kơ âu păng chơt hơ iă ƀôh tơdrong jang tơbôl kơ 2 păh roi năr roi hơtŏk kơjăp hloh. Kơdră teh đak bơ̆n Nguyễn Xuân Phúc pơkăl lơ̆m khei năr truh Liên hơp kuôk pơtoi đei dôm trong pơkăp jang tơtom, tơgŭm jên hu păng kih thuơ̆t ăn Việt Nam, lơ̆m noh tơrĕk tơgŭm Việt Nam tơplih trong jang hơtŏk tơnăp hloh đơ̆ng tơdrong Kăch mạng kŏng ngĭp 4.0, kơjăp hloh, tôm tong hloh, ưh đei prơih lê̆ bơngai yơ tơ̆ rŏng, trŏ ƀlep hăm trong pơkăp jang lơ̆m apŭng plenh teh, hơyak pơm kiơ̆ tơdrong hơpơi hơtŏk tơ iung teh đak mă Hop akŏm Đảng 'măng 13 hlôi tơlĕch.

Lan chih păng pơre nơ̆r