VOV4.Bahnar – Năr 30/7, tơ̆ plei tơm HCM, Kơdră teh đak bơ̆n Nguyễn Xuân Phúc bơ̆ jang hăm khul kơpal dơnơm kơ plei tơm HCM. Kơdră teh đak ră hơdăh tơchơ̆t adrol hloh păng kăp gĭt hloh lơ̆m khei năr âu noh vei lăng jơhngơ̆m jăn ăn kon pơlei, tơjur kơsô̆ bơngai lôch răm. Kiơ̆ kơ noh xơnong jang dơnơm noh athei pơm jang khŏm mă keh đang pơkăp oei ataih băl kiơ̆ Tơchơ̆t 16, păng 'meh vă jang keh noh athei tơrĕk ăn tơdrong erih kon pơlei, ưh đei lê̆ kon pơlei pơngot rơvĕt. Hăm plei tơm hloh 10 trĭu măt kon pơlei nhen plei tơm Hồ Chí Minh, tơdrong tơjră pơrang jĭ tơnap tap hloh, Kơdră teh đak pôk bơnê hăm khul kơpal, anih jang chĭnh trĭ plei tơm HCM hlôi đei dôm tơdrong tơchơ̆t tơtom, tơlĕch lơ trong jang tang găn păng tơjră pơrang jĭ, tơtom pơm kiơ̆ dôm trong pơyua ăn tơpôl, tơtom pơjing 'nao 16 hnam pơgang tơdăng hăm kơsô̆ giơng truh 50 rơbâu tŏ. Tơ̆ jơ bơ̆ jang, Kơdră teh đak bơ̆n ăn tơbăt, hlôi hơvơn dôm anih jang 'mêm bơnat lơ̆m păng 'nguaih kơ teh đak tơgŭm plei tơm HCM 103 tih hlj păng 10 tŏ kơmăi dui jơhngơ̆m atŭm hăm lơ tơmam drăm y tê̆ nai. Lơ̆m noh, anih jang mŭk drăm, anih mong jên tơgŭm 50 tih hlj, Anih mong jên Sacombank tơgŭm 30 tih hlj, anih jang mŭk drăm teh đak đe tơgŭm 1 trĭu đôlar.

Lan chih păng pơre nơ̆r