VOV4.Bahnar  – Xơng iŏk nơ̆r hơvơn đơ̆ng ƀok Tổng Bí thư, Kơdră teh đak Lào Thong-lun Xỉ-xu-lit, Kơdră teh đak bơ̆n Nguyễn Xuân Phúc atŭm hăm hơkăn ƀok chĕp kơ̆l Khul kơpal Việt Nam năm apong teh đak Cộng hòa dân chủ Nhân dân Lào đơ̆ng năr 9 truh năr 10/8/2021. Năr 9/8, tơ̆ Anih jang ƀok Kơdră, ƀok Tổng Bí thư, Kơdră teh đak Lào Thoong-lun Xỉ-xu-lít păng hơkăn ƀok hlôi pơm lêh xơng Kơdră teh đak bơ̆n Nguyễn Xuân Phúc păng hơkăn ƀok hăm khôi kăp gĭt ‘măn ăn đe kơdră kơpal kơ teh đak. Ƀar ƀok kơdră chơt hơ iă găh tơdrong hơtŏk ‘lơ̆ng rŏ lơ̆m tơbôl jang hadoi kơ 2 teh đak lơ̆m khei năr âu ki păng ‘măn lơ jơ pơma đam găh dôm trong jang vă tơgŭm dih băl lơ̆m tơdrong xek tơlang dôm tơnap tap kơyuơ pơrang jĭ Covid-19 pơm đei hăm rim teh đak păng tơdrong tơbôl jang hadoi Việt Nam - Lào; atŭm hăm noh drơ̆ng nơ̆r hơtŏk tơbôl jang hadoi lơ̆m tôm tơdrong jang, đơ̆ng chĭnh trĭ, jang tơbôl, vei xơđơ̆ng tơpôl, truh tơdrong pơtho pơhrăm, mŭk drăm, tĕch pơdro, axong jang, jang unh hơyuh, joh ayŏ, khoa hŏk kih thuơ̆t... vă atŭm băl yak hloh dôm tơdrong tơnap tap, iŏk yua trong hiôk mă trong jang kăch mạng kŏng ngĭp  4.0 hơ ‘nhăk ăn.

Lan chih păng pơre nơ̆r