VOV4.Bahnar – Ƀơ̆t tơbăt 80 xơnăm Năr juăt jue kơ Bơngai xơnăm 'lŏ Việt Nam (06/6/1941 - 06/6/2021), Kơdră teh đak Nguyễn Xuân Phúc hlôi pơtruh kơthơ thơ thâu hăm tôm bơngai xơnăm 'lŏ Việt Nam. Lơ̆m kơthơ, Kơdră teh đak hmach bơnê kơ dôm tơdrong đei jơnei tơgăl kơ pôk pơ ư đơ̆ng lơ hnưr bơngai xơnăm 'lŏ Việt Nam. Thơ thâu hăm Jơnŭm Bơngai xơnăm 'lŏ Việt Nam lơ̆m 80 xơnăm tơ iung pơjing hlôi keh đang tơnăp xơnong jang hăm lơ tơdrong jang kăp gĭt, tơdrong pơlong jang đei jơnei. Kơdră teh đak hơpơi 'moih bơngai xơnăm 'lŏ Việt Nam lơ̆m teh đak păng tơ̆ teh đak đe pơtoi tơgop đon bơnôh, kơ̆l 'ngok, tơdrong hlôh vao po vă tơ iung pơjing teh đak. Atŭm hăm noh pơkăl Anih jang kơ teh đak găh Bơngai xơnăm 'lŏ Việt Nam, dôm jăl jang Đảng, jơnŭm pơgơ̆r tơring, dôm anih jang tơpôl, rim unh hnam hơnơ̆ng tơrĕk, 'mêm kơ eng, kŭp yom hăm bơngai 'lŏ, pơih xă dôm tơdrong jang kăp gĭt tơrĕk ăn tơdrong erih đon bơnôh hăm bơngai 'lŏ xơnăm, pơm kiơ̆ tơnăp dôm tơdrong pơyua tơpôl, chĕp vei tơdrong tơgop đơ̆ng bơngai xơnăm 'lŏ, hơtŏk tơ iung tenh păng kơjăp xơđơ̆ng.

Lan chih păng pơre nơ̆r