VOV4.Bahnar – Pơtoi kơ dôm tơdrong jang tơ̆ Hoa Kỳ ƀơ̆t vang năm Hop akŏm anih jang kơ Liên hơp kuôk jăl 76 đơ̆ng năr 20 - 25/9/2021, tơ̆ plei tơm New York, Kơdră teh đak Nguyễn Xuân Phúc hlôi xơng pơma dơnuh hăm bôl boăl Hoa Kỳ, kơyuơ yă  Merle Ratner, Pơgơ̆r axong jang kơ Anih Hơvơn tơgŭm ăn bơngai ƀơm pơgang pơnhŭl da cam Việt Nam tơ̆ Hoa Kỳ chĕp kơ̆l. Tơ̆ jơ xơng, Kơdră teh đak Nguyễn Xuân Phúc bơnê kơ tơdrong tơgŭm đơ̆ng bôl boăl Hoa Kỳ hlôi đei lơ tơdrong tơgŭm ăn bơngai ƀơm răm đơ̆ng pơgang pơnhŭl da cam/dioxin, ƀôm min oei đei đơ̆ng rŏng kơ tơdrong tơblăh Việt Nam. Kơdră teh đak xơkơ̆t, đơ̆ng rŏng kơ hloh 25 xơnăm pơ 'lơ̆ng jang tơbôl Việt Nam – Hoa Kỳ hlôi hơtŏk kơjăp, đei jơnei xơđơ̆ng; lơ̆m noh hmach bơnê kơ tơdrong pơkăp păng tơgŭm đơ̆ng Hoa Kỳ găh xek tơlang tơdrong răm đơ̆ng tơblăh tơblŭng, tơgop kăp gĭt lơ̆m tơdrong pơjing đon lui hăm tơdrong adrin kơ 'nôh đơ̆ng ƀar păh. Kơdră teh đak 'meh vă bôl boăl Hoa Kỳ pơtoi tơgŭm hơtŏk tơdrong tơbôl păng jang hadoi kơ ƀar teh đak, mă kăl noh lơ̆m tơdrong xek tơlang tơdrong răm đơ̆ng pơgang pơnhŭl da cam/dioxin.

Lan chih păng pơre nơ̆r