VOV4.Bahnar - Tơdrong phă pơrăm bri tơ̆ dêh char Dak Lăk tŏk bŏk kơtang. Đơ̆ng blŭng sơnăm trŭh dang ei, tơ̆ Dak Lăk hlôi đei 650 ‘măng đe kŏh pơrăm bri, bơbĭt iŏk tĕh mir đak lar, tơmơ̆t vă jê̆ mĭnh poăt akŏp ‘măng pơm glăi khôi luơ̆t bri lơ̆m tĕh đak bơ̆n. Tơdrong kŏh pơrăm bri, bơbĭt iŏk tĕh bri tơ̆ Dak Lăk jĭ tôch kơtang, lơ tơring kŏh pơrăm bri đunh khei ‘năr mă lei oei tim mă xek tơlang keh đang ‘mơ̆i.

Kŏh pơrăm bri, bơbĭt iŏk tĕh bri tŏk bŏk kơtang tơ̆ lơ tơring

Lơ groi bri găh Kŏng ty mir đak lar vei lăng bri Krông Bông (apŭng Krông Bông, dêh char Dak Lăk), bri tŏk bŏk răm đe kŏh pơrăm. Rim groi kông đe kŏh pơrăm ‘long bri đơ̆ng jơ̆ng kông trŭh tơ̆ loĕl kông hloi. Yak kiơ̆ trong tĕh mơ̆t lơ̆m bri, rơ hiŭng rơ hiăng bri ‘long đe kŏh tơpăk, sŏh, lơ ‘long tĭh, ‘long iĕ đe kŏh tơpăk kĕt keng. Lơ dơnơm ‘long đe ‘nao kŏh, ‘long tĭh trŭh 2 ‘nu grom. Ƀok Bùi Văn Hưng, Kơdră chĕp pơgơ̆r Mir đak lar Krông Bông pơma:“Tơdrong bơ̆ jang vei lăng năng tông bri tơnap tap tơ pă mơ̆n. Mă kăl Kŏng ty mir đak lar Krông Bông tơ til hăm ƀar apŭng Ea Kar păng M’Drăk, tŏk bŏk lơ̆m tơring oei sa kơ kon pơlei bơngai Hmông, hăm đei 11.000 ‘nu bơngai. Lơ̆m hơgăt tĕh mă Kŏng ty vei lăng jei plĕh plŏh lơ̆m hơgăt tĕh vei lăng kơ Dơnŏ anĭh vei lăng kon pơlei rim tơring. Pơm ăn trŭh vei lăng năng tông kon pơlei mơ̆t klĕnh lơ̆m bri kŏh pơrăm bri ‘nŏh tôch mơmat tat.”

Tơdrau khei blŭng sơnăm, tơ̆ Dak Lăk đei 650 ‘măng đe kŏh pơrăm bri, bơbĭt iŏk tĕh bri ‘nŏh hơdrô̆ tơ̆ Kŏng ty mir đak lar Krông Bông hlôi đei 425 ‘măng hăm bri hiong răm trŭh 108ha, tơmơ̆t vă jê̆ 3/4 ‘măng pơm glăi lơ̆m dêh char. Kiơ̆ đơ̆ng ƀok Trần Văn Tùng, Kơdră chĕp pơgơ̆r Hơnĭh vei lăng bri apŭng Krông Bông, bri ‘long tơ̆ Kŏng ty mir đak lar Krông Bông răm kơ đe kŏh pơrăm kĕt keng, hơnơ̆ng păng đunh khei ‘năr, tơdrong glăi mă blŭng jĭ kơ yuơ đơ̆ng tơngla bri:“Tơdrong kŏh pơrăm bri đunh khei ‘năr au ‘nŏh kơ yuơ tơngla bri vei lăng ư̆h tơnăp. Kŏng ty mir đak lar bri ‘long Krông Bông đei tĕh đak pơjao ăn hơgăt tĕh bri tôch kơ să mă lei bơngai bơ̆ jang vei lăng bri tă tŏ sĕt, đơ̆ng nŏh groi tĕh bri mă Kŏng ty vei lăng đei ƀô̆h hơnơ̆ng đei kŏh pơrăm bri, kŏh iŏk ‘long, tĕch răt ‘long hơnơ̆ng păng tôch kơtang.” 

Tŏk bŏk đei tơdrong vei lăng bri ư̆h tơnăp đơ̆ng tơngla bri tơ̆ Dak Lăk

Atŭm hăm Krông Bông, tơdrong kŏh pơrăm bri, bơbĭt iŏk tĕh bri jei tŏk bŏk đei ƀô̆h kơtang tơ̆ rim apŭng anai nhen apŭng Ea Súp, Cư M’gar păng Ea H’leo. Ƀok Nguyễn Văn Quyến, Kơ iĕng Kơdră chĕp pơgơ̆r Kŏng ty pơm tơlĕch tơmam drăm păng bri ‘long Dak Lăk tơbăt, hơnĭh au đei pơjao vei lăng hlŏh 27.000 ha bri păng tĕh bri tơ̆ apŭng Ea Súp. Tơdrong kŏh pơrăm bri, bơbĭt iŏk tĕh bri lơ̆m groi tĕh kơ Kŏng ty vei lăng jĭ tôch kơtang. Đơ̆ng sơnăm 2017 truh dang ei, đei dang 400ha bri păng tĕh bri kơ kŏng ty răm đe kŏh pơrăm, bơbĭt iok tĕh hlôi đei pơm hla bơar. Mă lei, đei tŏ sĕt tơdrong pơm glăi đei dăr lăng, xek phak păng tơdrong xek phak tim gan kơtang, tim gan kơ hret kơna pơm ăn khŭl kŏh pơrăm bri ư̆h kơ gan hli, hơnơ̆ng năm kŏh pơrăm bri:“Dôm bơngai kŏh pơrăm bri, bơbĭt iŏk tĕh bri tôch bơ brơ̆t, ư̆h kơ hli, tơ jră plơ̆ hăm khŭl vei lăng bri kơ kŏng ty dơ̆ng. Rim ‘măng tĕh dong, pơ joă, phă pơrăm mŭk drăm, rim hơnĭh gak vei lăng bri kơ kŏng ty ‘nŏh hlôi pơm hla bơar pơtrŭh ăn khŭl bơ̆ jang kơpal, mă lei trŭh dang ei oei tim mă xek tơlang ‘mơ̆i. Mă kăl rim ‘măng bơbĭt iŏk tĕh bri pơm hnam, pơm pơk lơ̆m hơgăt tĕh kơ kŏng ty jei tim mă xek tơlang keh đang mơ̆n.”

          Lơ̆m mă nŏh, ƀok Ngô Văn Thắng, Kơ iĕng Kơdră chĕp pơgơ̆r Dơnŏ anĭh vei lăng kon pơlei apŭng Ea Sŭp tơbăt akhan, tơdrong kŏh pơrăm bri lơ̆m apŭng ‘noh tôch kơtang, đei tơdrong tơm pơm ăn ‘nŏh đơ̆ng vei lăng ư̆h tơnăp kơ tơngla bri păng pơ đĭ rim hơnĭh bơ̆ jang găh au, mă kăl hơgăt tĕh bri pơjao ăn rim hơnĭh mơdro sa jang vei lăng:“Tơdrong vei lăng tang găn, xek phak phă pơrăm bri, hơmet ming tĕh bri mă đe bơbĭt iŏk tơ ƀơ̆p tôch mơmat tat. Đei hloi tơdrong vei lăng năng tông bri ư̆h tơnăp, ư̆h ‘lơ ‘lŏ. Lơ hơnĭh mơdrop sa ư̆h pơjing khul joăt vei lăng bri, dăh mă mă đơ̆ng đei ră ‘nŏh khŭl vei lăng au jei ư̆h kơ kĕ vă bơ̆ jang vei lăng năng tông bri hroong.”

          Hlôi vă jê̆ 7 sơnăm Khŭl kơdră tĕh đak hlôi pơrô̆ athei tang ‘măng bri păng jang kiơ̆ trong jang kăl lơ̆m vei lăng năng tông bri brăh. Mă lei, tơdrong đei ƀô̆h tơ̆ Dak Lăk tơ ƀô̆h hơdăh, rim trong jang vei lăng bri oei tim mă kơtang, tơdrong kŏh pơrăm bri, bơbĭt iŏk tĕh bri oei ƀô̆h hơnơ̆ng. Tơpă yan au đei ƀô̆h, tŏk bŏk đei tơdrong vei lăng năng tông bri ư̆h tơnăp đơ̆ng tơngla bri păng đơ̆ng lơ hơnĭh bơ̆ jang. Lơ̆m mă nŏh, tơdrong xek tơlang jei tim mă kơ hret, xek tơlang pơm glăi tim gan keh đang, pơm ăn trŭh lơ tơring hlôi jing đei tơdrong kŏh pơrăm bri kơtang hlŏh. Tơdrong mă au pơdui đunh lơ sơnăm pơm ăn tơdrong xek tơlang rim tơdrong glăi lơ̆m vei lăng năng tông bri roi năr roi tơnap tap, kăl đei tơdrong vang iung jang đơ̆ng lơ hơnĭh bơ̆ jang hăm kơrŭn đĭ jơhngơ̆m ‘nĕi mă kĕ tang găn đe kŏh pơrăm bri.

Bơngai chĭh: Công Bắc – VOV Tây Nguyên

Tơblơ̆ nơ̆r: Amazưt