VOV4.Bahnar - Khei năr au ki, tơdrong kŏh pơrăm bri, chơ pơdŭ ‘long bri glăi hơnơ̆ng kơtang tơ̆ 2 dêh char Kon Tum păng Gia Lai. Mơ jĭt hektar bri tơ̆ ƀar apŭng sơlam tĕh đak Ia H’Drai, dêh char Kon Tum răm kơtang vă iŏk tĕh chŏh jang sa, mă lei rim mă đei hơnĭh tơngla bri ayơ chĭu pŭ tơdrong răm au. Găh tơ̆ apŭng atăih yăih K’Bang, dêh char Gia Lai, ‘nŏh bri ‘long yôih tĭh, hui kơ đei đekŏh pơrăm kơtang vă iŏk ‘long. Lăp khei ‘năr ư̆h kơ đunh, khŭl bơ̆ jang hlôi ƀô̆h dang 50 met khô̆i ‘long gĭt kăl hlôi đei chơ lĕch đơ̆ng bri.

Bri đei mŭih sŏh vă iŏk tĕh jang sa tơ̆ Ia H’Drai – Kon Tum

Tơ̆ groi bri 726, găh tơring sơlam tĕh đak Ia Dal, apŭng Ia H’Drai, dêh char Kon Tum đei 17ha bri hlôi hlôi mŭih kŏh vă iŏk tĕh choh jang sa. Tơ̆ groi bri kŏh pơrăm lăng ƀô̆h dôm tŏ ‘long tĭh gĭt kăl đe tret jăl, ot chơ pơdŭ năm tơ̆ nai. Găh să lơ̆m 17 ha au kon pơlei hlôi pơtăm ƀum ƀlang păng pơtăm ‘long găr sơlơ̆k. Ƀok Nguyễn Quốc Tuấn, Kơdră chĕp pơgơ̆r Hơnĭh vei lăng bri apŭng Ia H’Drai sơkơ̆t hơdăh, hơgăt tĕh bri 17ha au găh Kŏng ty ksu Sa Thây vei lăng:“Kiơ̆ chih jô̆ bri sơnăm 2014 păng sơnăm 2020 ‘nŏh hơgăt tĕh bri 17 ha au găh Kŏng ty ksu Sa Thây vei lăng hlôi tơplĭh vă pơtăm ‘long ksu”.

            Lơ lŏh kiơ̆ đơ̆ng khŭl kơdră păng hơnĭh vei lanwg bri apŭng Ia H’Drai ‘nŏh 17ha au lơ̆m hơgăt tĕh 6.000ha Kŏng ty ksu Sa Thây mơng, ‘nŏh jing bri au hlôi tơplĭh iŏk yua, pơgĕnh iŏk ‘long hơdrol vă pơjao ăn Kŏng ty au. ‘Nau jing tơdrong tơm vă khŭl kơdră tơring Ia Dal, Hơnĭh vei lăng bri păng Dơnŏ anĭh vei lăng kon pơlei apŭng Ia H’Drai sơkơ̆t hơdăh 17ha bri đe kŏh pơrăm au ư̆h khan bri. Mă lei, ƀok Đỗ Thanh Nam, Kơdră chĕp pơgơ̆r Kŏng ty sơkơ̆t hơdăh akhan, tĕh au ư̆h kơ găh Kŏng ty vei lăng: “Groi tĕh 17 ha au ‘nŏh groi tĕh ư̆h kơ păh Kŏng ty vei lăng, kơna ‘nau jing ư̆h khan tĕh bri kơ Kŏng ty ôh. Lơ lŏh tơpă văi, rŏ năng chă hơvơl đĕch. Hơgăt tĕh au ư̆h khan păh Kŏng ty vei lăng ôh”.

Dôm ‘long tĭh tơ̆ Ia H’Drai đei chơ năm tơ̆ nai

Tơdrong 17ha bri tơ̆ tơring Ia Dal, apŭng Ia H’Drai, dêh char Kon Tum đe kŏh pơrăm vă iok tĕh jang sa hlôi đei Kơdră chĕp pơgơ̆r Đảng dêh char Kon Tum Dương Văn Trang pơrô̆ athei pơm hơdăh đơ̆ng năr blŭng khei 6. Mă lei vă jê̆ 1 khei hlôi hlŏh, dôm nơ̆r pơma đơ̆ng rim hơnĭh bơ̆ jang oei tim mă pơma hơdăh yă kiơ ‘mơ̆i.

Găh tơ̆ apŭng Kbang, dêh char Gia Lai, khŭl bơ̆ jang ‘nao ƀô̆h dang 50 met khô̆i ‘long gĭt kăl hlôi răm đe kŏh iŏk păng chơ pơdŭ lĕch đơ̆ng bri. Tơ̆ groi bri 25, găh Kŏng ty mir đak lar bri ‘long Đak Roong vei lăng, đei lơ ‘long yôih păng ‘long hơngo kơ jung trŭh mơjĭt met,tĭh đơ̆ng 80 cm trŭh 1,5 met răm đe kŏh tơpăk. Tơ̆ hơnĭh lăp ƀô̆h tơngơ̆l atŭm hăm iă juơ, tơ̆l păng sơdrai kơ nhŏng. Găh ‘long hlôi đei chơ lĕch đơ̆ng bri. Dôm tơngơl pơ đĭ ‘nao păng so đei ƀô̆h, tơdrong chă kŏh ‘long bri tơ̆ au hlôi pơgơ̆r đunh năr. Ƀok Nguyễn Minh Sự, Kơdră chĕp pơgơ̆r Kŏng ti mir đak lar bri ‘long Đak Roong, apŭng Kbang tơblang hơdăh:“Tơdrong hrei au, kon pơlei lơ̆m tơring ‘mĕh vă pơm hnam păng pơm rông tôch kơ lơ; đei bơngai lôch lơ̆m pơlei, đe sư jei năm mơ̆t tơ̆ bri kŏh ot ‘long. Kon pơlei tơ̆ au ư̆h kơ joăt iŏk ‘long kro vă pơm hơboong, mă lei iŏk ‘long hơdrĭh. Đei mĭnh ‘nu bơngai hlôi pơgơ̆m tơdrong ‘nau kơna vă kŏh, tĕch mơdro. Tơdrong vei lăng năng tông tôch mơmat tat.”

Hơnĭh kŏh pơrăm ‘long yôih tĭh tơ̆ Kbang – Gia Lai

Ư̆h khan lăp pơm pơrăm kơtang găh bri ‘long, tơdrong chơ pơdŭ păng pơm lăp tơdrong chă kŏh ‘long tơtông tơ̆ apŭng Kbang dêh char Gia Lai jei đei ƀô̆h kơtang mơ̆n. Au ki, tơ̆ tơring Đak Smar, khŭl bơ̆ jang vei lăng bri apŭng Kbang hlôi ƀô̆h gre kơsô̆ BKS 81C-177.40 chơ 21,3 met khô̆i ‘long, đei 15 tŏ ‘long yôih hơpôm, ot đei dăng klơ̆p hăm koăl tăng tôch kơ hrep.

Vă tơchă băt hơdăh găh ‘long au, Hơnĭh mơdro sa ŭnh hnam pơm tơm Giao Trang (kơ yuơ ƀok Hồ Ngọc Dao, oei tơ̆ thĭ trân Kbang, apŭng Kbang pơm tơngla) tơ ƀô̆h ăn hla bơar akhan, ‘long au đei răt đơ̆ng mĭnh hơnĭh mơdro sa ŭnh hnam pơm tơm tơ̆ Thanh Khê, Đà Nẵng đơ̆ng khei 2/2015. Mă lei, ƀok Trương Thanh Hà, Kơdră chĕp pơgơ̆r Dơnŏ anĭh vei lăng Bri apŭng Kbang tơbăt, hla bơar chĭh tơbăt păng ‘long au ư̆h kơ đei ƀơm dĭh băl păng ‘long au ‘nŏh ‘long đe kŏh tơtông. “Kbang ‘nŏh đei tĕh bri să, đei ‘long tĭh lơ, kơna jing ‘nhĕm ‘nhot ‘lơ̆ng ăn khŭl kŏh tơtông ‘long bri. Trong jang kơ Hơnĭh vei lăng bri Kbang ‘nŏh iung jang hơdoi hăm hơnĭh bơ̆ jang kanh sat dăr lăng, tơngla bri, kơdră tơring vă pơm hơdăh dôm bơngai kŏh, tĕch mơdro tơtông păng gô xek tơlang kơ hret kiơ̆ khôi luơ̆t; đei ‘măng tơdăh glăi kơtang lei nhôn apĭnh sek tơlang hloi vă tơbrar ăn bơngai anai.”

Kiơ̆ đơ̆ng Dơnŏ anĭh vei lăng kon pơlei apŭng Kbang, dêh char Gia Lai, rim khŭl bơ̆ jang hlôi ƀô̆h 40 ‘măng pơm glăi Khôi luơ̆t bri, hloh 1 poăt kơsô̆ au kŏh tơtông bri ‘long. Ƀok Nguyễn Văn Dũng, Kơdră chĕp pơgơ̆r Dơnŏ anĭh vei lăng kon pơlei apŭng tơbăt, apung hlôi tơlĕch lơ trong jang vă vei lăng năng tông bri, mă lei tim mă kĕ ‘mơ̆i. Apŭng jei hlôi tơgoăt iŏk dôm nơ̆r tơgop đơ̆ng kon pơlei, tơroi tơbăt hơdăh găh tơdrong  kang ƀô̆ vei lăi bri mĭnh ƀơ̆r đon hăm khŭl koh tơtông ‘long păng tŏk bŏk bơ̆ jang pơm hơdăh tơdrong au:“Tim mă băt hơdăh tơdrong kang ƀô̆ tơgŭm dŏng khŭl kŏh tơtông dăh mă ư̆h, mă lei lơ̆m au đei ƀô̆h tơdrong vei lăng năng tông bri ư̆h tơnăp tơpă mơ̆n. Hăm bơngai chĕp kơl tơring, nhôn pơrô̆ kơtang xek tơlang kơhret rim kang ƀô̆ păng khŭl tơtông ‘long bri, chơ pơdŭ ‘long bri glăi. Păng athei hơnĭh bơ̆ jang dăr lăng tơtom iung jang tơkêng hloi dôm tơdrong pơm glăi hlôi đei pơtrŭh ăn hơnĭh bơ̆ jang dăr lăng.”

Lăp đơ̆ng rŏng ƀô̆h gre chơ ‘long hăm dôm hla bơar đei jau pơm ya, khŭl bơ̆ jang apŭng Kbang, dêh char Gia Lai hơnơ̆ng ƀô̆h bri ‘long đe kŏh pơrăm, lơ ‘long ti răh đe kŏh tơpăh. Akŏp ‘long răm lơ̆m rim ‘măng dăr lăngau ki ‘nŏh hlŏh 50 met khô̆i./.

VOV Tây Nguyên chĭh

Amazưt tơblơ̆ nơ̆r