VOV4.Bahnar - Dôm khei âu ki, kon pơ lei chŏh jang sa 2 păh pơ nơ̆ đak krong Đa Nhim, jăl ro klĕch xăh Lạc Xuân, apŭng Đơn Dương (Lâm Đồng) mơ mat yua kơ đak đei ‘mê̆ ‘mach kơ tang. Hlôi đei lơ hơ găt ‘nhot đei ư̆h kơ sa yua kơ tơ ruih ƀơm đak ‘mê̆ ‘mach, kơ sŏk yua đơ̆ng kôch hcuơh pơm ăn.

          Mă đơ̆ng hlôi hơ met tôm tơ drong kăl vă pơ tăm ‘nhot hơ drih plơ̆ng, mă lei hloh 10 năr âu ki, ŭnh hnam mŏ Nguyễn Thị Lành, oei tơ̆ thôn Diom B, xăh Lạc Xuân, apŭng Đơn Dương oei hiơ hiơ̆, ư̆h kơ pơ̆n rei hơ drĕch yua hli kơ lôh. Tơ drong tơm pơm ăn ‘noh jĭ yua đơ̆ng đak tơ rŭih đơ̆ng đak krong Đa Nhim hlôi đei kơ sŏk ‘nhơ ‘nhoeng, ƀơ̆t lăp đak krong kơ hluơ̆l vĭ teh yua đơ̆ng kôch iŏk chuơ̆h mơ sưt mơ sat đơ̆ng 1 anih jang mơ dro sa tơ̆ đak krong hloi. Kiơ̆ kơ mŏ Lành, tơ drong pơ tăm ‘nhot rim kơ loăi, mă loi ‘noh ‘nhot hla bey krôp, ‘nhot hơ drih, cải thảo… athei đak mă ‘lơ̆ng, tơ dăh tơ rŭih đak ‘mê̆, đak teh hoh păng đei lơ vĭ teh ‘noh lăng nhen hiong pơ goh, hiong răm mŭk drăm lơ.

           “Hơ met ăn đang pơ yan ‘nâu ‘noh 1,3hek tar ‘nhot hơ drih hloi, mă lei mư̆h tơ drong đak kơ sŏk nhen thoi âu ‘noh ‘nhot gô hư đĭ. Pơ tăm ‘nhot hơ drih mư̆h 2 truh 3 giĕng ‘noh pơ tơm tơ lôm hla dơ̆ng bơ̆ih, tơ dăh tơ rŭih đak âu ‘noh ‘nhot gô găm soet, nhôn hiong pơ goh dơ̆ng.”

Tơ ring kôch iŏk chuơh tơ̆ đak krong Đa Nhim đơ̆ng Kŏng ti TNHH Lê Văn Oai Lâm Đồng

          Tơ drong jang kôch iŏk chuơh pơm ăn đak krong Đa Nhim kơ sŏk, ‘mê̆ ‘mach ƀơm kơ nê̆ tih truh tơ drong jang sa đơ̆ng lơ kon pơ lei. Kiơ̆ kơ yă Phan Thị Cấp, oei tơ̆ La Bouye A, xăh Lạc Xuân, mă đơ̆ng đak ư̆h kơ ‘lơ̆ng mă lei kon pơ lei athei tơ rŭih đak ăn kơ ‘long pơ tăm yua  ư̆h kơ đei nai tơ plih. Hlôi đei lơ hơ găt ‘nhot  pơ kao đei hư đĭ, ‘long pơ tăm hiơ̆ kơ bluh vơ̆ yua kơ tơ rŭih đak kơ sŏk. Tơ dăh tơ drong ‘nâu hơ nơ̆ng pơ dui đunh gô tŭn lơ kon pơ lei jang chŭn mir lơ̆m tơ drong mơ mat tat, lơ̆m noh đei ŭnh sa sư.

           “Pơ tăm băp sŭ mă tơ rŭih đak kơ sŏk ‘noh tơ̆ lơ̆m đei kơ toăl kơ mâu găm, mơ mat loh ‘noh. Pơ ma atŭm, arih tơ̆ đak krong Đa Nhim âu ‘noh lăp đei gơ nang kơ đak đơ̆ng đak krong Đa Nhim đĕch. Pơ yan tơ̆ hơ năp kơnh ‘noh ‘mi đei đak lơ̆p đĭ hloi, oei pơ yan ‘nâu akŏm pơ tăm ‘noh đak ư̆h kơ gơ̆h tơ ruih dơ̆ng”.

Kon pơ lei blĕk kơ đon yua kơ đak krong đei ‘mê̆ ‘mach, kơ sŏk, ƀơm ư̆h kơ ‘lơ̆ng truh tơ drong choh jang sa

          Đa Nhim ‘noh jĭ đak krong tih ro klĕch lơ xăh, thị trấn kơ apŭng Đơn Dương păng 1 păh apŭng Đức Trọng, anih pơ truh đak tơ ruih tơm pơ yua ăn choh jang sa ăn tơ ring pơ tăm ‘nhot tơm kơ dêh char Lâm Đồng. Tơ drong kăl kơ tơ roi, khei ‘năr âu ‘noh pơ yan tŏ, đak tơ̆ đak krong Đa Nhim ư̆h kơ jrăh jrai mă lei anih jang kôch iŏk chuơh ‘noh Kŏng ti TNHH Lê Văn Oai Lâm Đồng (anih bơ̆ jang tơ̆ apŭng Đơn Dương) hlôi hơ vơn 2 duk tih vă hyup chuơh tŏk tơ̆ kông. Đak vĭ ư̆h kơ đei hơ met pơ ‘lơ̆ng đei anih jang mơ dro sa âu pơ choh kơ tă ro dơ̆ng tơ̆ lơ̆m đak krong, pơm ăn đak krong roi sa kơ sŏk ‘nhơ ‘nhoĕl.

            Đei băt, Kŏng ti TNHH Lê Văn Oai Lâm Đồng đei dêh char Lâm Đồng asong ăn bơ̆ jang kôch iŏh chuơh tơ̆ âu lơ̆m hơ găt teh hloh 11hek tar, vă  khan tơ ter kiơ̆ 1 jăl đak krong Đa Nhim  đei kơ jung vă jê̆ 6km. Khei ‘năr pơ tơm kôch iŏk ‘noh ‘năr 30/11/2020 păng pơ dui đunh truh 14 sơ năm 5 khei. Ƀok Hoàng Công Hiếu, Kơ dră anih jang vei lăng tơ mam drăm păng cham char apŭng Đơn Dương tơ băt, tơ drong kŏng ti âu kôch iŏh chuơh pơm ăn ‘mê̆ ‘mach đak, ƀơm ư̆h kơ ‘lơ̆ng truh jang sa đơ̆ng kon pơ lei ‘noh đei tơ pă. Tơ̆ hơ năp kơnh, tơ dăh tơ drong ‘nâu ư̆h kơ đei păh anih jang mơ dro sa  hơ met pơ ‘lơ̆ng ‘noh gô athei pơ dơh kơ bơ̆ jang kôch iŏk chuơh âu ‘mơ̆i.

           “Lơ̆m kơ plăh kôch iŏk athei vei sơ đơ̆ng đak ăn kơ kon pơ lei pơ yua ăn chŏh jang sa. Mă lei, truh khei ‘năr âu, kiơ̆ tơ roi tơ băt đơ̆ng kon pơ lei ‘noh đak tơ ruih oei ư̆h kơ vei sơ đơ̆ng ‘lơ̆ng. Yua thoi noh, vă jê̆ truh âu apŭng kŭm hăm Anih jang vei lăng găh tơ mam drăm păng cham char gô đei năm hơ len lăng dơ̆ng đang kơ ‘noh athei tơ ‘ngla anih jang mơ dro sa athei hơ met pơ ‘lơ̆ng. Tơ dăh ư̆h kơ hơ met pơ ‘lơ̆ng ‘noh gô athei pơ dơh kơ bơ̆ jang kôch iŏk chuơh đơ̆ng ƀok Lê Văn Oai”.

Ư̆h khan lăp ‘mê̆ ‘mach đak, lơ jăl bơ nơ̆ đak krong hlôi đei ƀôh teh hơ lih

Ư̆h khan lăp đak đei ‘mê̆ ‘mach kơ tang, tơ drong kôch iŏk chuơh đơ̆ng Kŏng ti TNHH Lê Văn Oai Lâm Đồng hlôi pơm ăn lơ jăl bơ nơ̆ đak krong Đa Nhim đei tơ drŭt, hơ bông hơ bang, hơ mơt kơ teh hơ lih tih lơ̆m pơ yan ‘mi tih truh ‘noh tôch kơ tang. ‘Ngoăih kơ ‘noh, lơ̆m kơ plăh bơ̆ jang kôch iŏk chuơh, kŏng ti âu oei bơ̆ găn kơ dih đak ro hơ tŏ đak krong, hơ dai hăm ‘noh tam mă pơm kiơ̆ tôm dôm nơ̆r pơ kăp kiơ̆ tơ drong hơ găt đơ̆ng khôi luơ̆t, lơ̆m noh đei tơ drong ư̆h kơ pơm kiơ̆ pơ lăp hơ nih kŏng kĭ tơ̆ hơ nih hơ nhăk chuơh lĕch đơ̆ng tơ ring, ư̆h kơ pơ lăp camera tơ̆ hơ nih mong chuơh vă vei răk tơ drong kơ tơ̆ng ang...

Quang Sáng : Chih

Thuem: Tơ blơ̆