VOV4.Bahnar - Kiơ̆ Anih vei lăng tơ drong lui khop dêh char Dak Nông ăn tơ băt, tơ̆ dêh char Dak Nông dang ei đei dang 160.420 ‘nu bơ ngai kiơ̆ lui khop; 70 ‘nu ƀok pơ tho lui; 77 tŏ hnam hơ kŭm. Dôm sơ năm âu ki, kon pơ lei kiơ̆ lui Kŏng yăo tơ̆ dêh char Dak Nông tơ gop dang 28 ti 864 triu hlak jên păng rơ bâu năr jang kŭm hăm Khul kơ dră tơ ring pơm trong tơ̆ tơ ring tơ rang. Dang ei lơ̆m dêh char đei 29/60 xăh đei chih tơ băt jang đang tơ drong pơ jing tơ ring tơ rang ‘nao. Gơ̆h iŏk đei tơ drong ‘nâu ‘nŏh gơ nơm tơ drong vang jang đơ̆ng rim anih jang chinh trĭ păng đĭ đăng tơ pôl, lơ̆m nŏh đei tơ drong tơ gop tôch lơ đơ̆ng đe ƀok pơ tho, dôm bơ ngai kiơ̆ lui kŏng yăo.

Trong tơ̆ plei Bu Bir mă lơ ‘nŏh đơ̆ng kon pơ lei tơ gop jên pơm

Ƀok Điểu Khuyên (bơ ngai M’Nông) ƀok pơ gơ̆r plei Bu Bir, xăh Quảng Tín, apŭng Đắk R’Lấp ăn tơ băt, pơ lei oei adrin vă jang đei tơ drong hơ găt “tơ ring tơ rang ‘nao ‘lơ̆ng hơ iă”. Dôm năr ‘nâu kon pơ lei chơt hơ iă sơng pơ yan Noel mă lei oei tôch kơ chăng tang găn jĭ Covid-19 ‘năi: “Tơ pă ‘nei, tơ dăh ưh đei jĭ ‘nŏh kon pơ lei tôch chơt mưh truh năr lêh têt, năr Noel, chă pơ gơ̆r kiơ̆ tơ drong juăt đơ̆ng bơ ngai M’nông. Noel đang ‘nŏh truh têt. Hrei ‘nâu jĭ hơ buh oei tôch hơ mơt, chơt ‘nŏh chơt mă lei athei pơ gơ̆r kơ dih lơ̆m unh hnam đĕch, lê̆ chă ngôi akŏm lơ bơ ngai”.

Dơ̆ng: Tơ blơ̆