VOV4.Bahnar - Nhen hlôi tơ roi, đơ̆ng 12 sơ năm tơ lĕch jang tơ drong jang pơm dơ nâu mong đak 4.400 ti Krông Pách thượng, truh khei 3 âu ki, kon pơ lei tơ̆ tơ ring dơ nâu đak pơ tơm đei pôk rĭ truh tơ̆ hơ nih oei ‘nao. Hăm hloh 700 ŭnh hnam, dang 4.000 ‘nu bơ ngai kăl kơ pôk rĭ, tơ drong jang proh hơ met ăn kon pơ lei tơ̆ hơ nih oei ‘nao ‘noh tôch kơ lơ. Blŭng a rim khŭl jang kơ pal tơ ring iŏk jang tơ drong tơ gŭm kon pơ lei. Mă lei, yua kơ jĭ Covid-19 đei ƀôh krê hơ mơt, rim khŭl jang athei tơ gŭm hơ drol ăn tơ drong jang tang găn jĭ. Kơ plăh dâu, kon pơ lei hlôi hơ tŏk jơ hngơ̆m tơ goăt tơ goăl bơ ngai truh hơ drol tơ gŭm bơ ngai truh đơ̆ng rŏng pơm hnam, sơ đơ̆ng tơ drong arih sa.

          Unh hnam yă Ma Thị Sìn oei tơ̆ thôn 9, xăh Cư San, apŭng M’Đrắk năm oei tơ̆ hơ nih oei hle kơ sô̆ 1 đơ̆ng tơ drong jang pơm dơ nâu mong đak  Krông Pách thượng, xăh Cư Elang, apŭng Ea Kar lơ̆m khei ‘năr jĭ hơ buh Covid-19 đei ƀôh krê hơ mơt tơ̆ pơ đĭ 2 apŭng năm păng truh. Rim khŭl jang kơ pal hơ drol ki iŏk jang tơ drong tơ gŭm kon pơ lei oei tơ̆ plei hle vă đĭ đăng hlôi akŏm ăn tơ drong jang tang găn jĭ. Mă lei tôch kơ pŭn, dôm ŭnh hnam oei hle hơ drol, mă hlôi pôm pơ lei, pôm xăh, ‘noh rông ƀôt, kơ tum kơ tŏng ‘nhŏng oh hlôi vang hơ dai băl tơ gŭm ŭnh hnam sư pơm hnam. Gơ nang đơ̆ng noh, lăp đơ̆ng rŏng dang 1 giĕng, hnam hlôi pơm đang, unh hnam sư hlôi sơ đơ̆ng tơ̆ hơ nih oei ‘nao:

          “Lơ̆m pơ lei, đe tơ gŭm nhôn pơm hnam, đang ‘noh tăh pơ bŭng, tung jur tŏk. Kon pơ lei bơ ngơ̆t ăn kơ nhôn thoi noh ‘noh ‘lơ̆ng dêh bơih.”

Kon pơ lei oei tơ̆ plei hle đơ̆ng tơ drong jang pơm dơ nâu mong đak Krông Pách thượg tơ gŭm băl pơm hnam lơ̆m khei ‘năr jĭ Covid-19 đei ƀôh krê hơ mơt tơ̆ Dak Lak

Ƀok Vàng Seo Pao, thôn phŏ pơ gia kơ hơ nih oei hle kơ sô̆ 1, xăh Cư Elang tơ băt, hlôh băt tơ drong jang tang găn jĭ khei ‘năr âu ‘noh tôch kơ gĭt kăl, ƀơ̆t mă rim khŭl jang kơ pal hăt kơ tang găn jĭ, kon pơ lei tơ chă trong tơ gŭm băl. Hăm dang 130 unh hnam hlôi năm oei truh tơ̆ hơ nih oei hle, 1 hnam rơ̆ih ăn 1,2 ‘nu păng pơ lei pơm đei 9 grŭp. Rim grŭp âu pơ lơh băl tơ gŭm dôm ŭnh hnam ‘nao truh pơm hnam, sơ đơ̆ng tơ drong arih sa:

“Kŭm pơ jing đei 9 grŭp tung tăh, pơm hnam. Dôm ŭnh hnam truh đơ̆ng rŏng ‘noh gơ nang ‘nhŏng oh kueng ƀôt âu pơm hnam ‘noh ưh kơ đei mơ mat tat kiơ ôh. Pơm hnam ‘noh năr kŭm đei 30-40 ‘nu, kŭm pơm đang, tăh pơ bŭng đang lơ̆m năr, oei hnam hum, chă pơ yơ̆ng ‘noh tơ ‘ngla chă pơm kơ dih. Pơ tih gia ‘năr dơ ning đei ŭnh hnam Lý Seo Cháo truh ‘noh ‘nhŏng Đông hlôi tơ roi ăn bơ ngai pơ gơ̆r grŭp bơih. Bơ ngai pơ gơ̆r grŭp kŭm tơ roi tơ băt ăn kơ dôm bơ ngai vang jang lơ̆m grŭp tơ gŭm bơ̆ih.”

          Ƀok Trần Văn Đông, Phŏ kơ dră Anih vei lăng găh choh jang sa păng hơ tŏk tơ iung tơ ring tơ rang apŭng Ea Kar, anih jang pơ gơ̆r sơng iŏk kon pơ lei năm oei tơ̆ plei hle đơ̆ng tơ drong jang  pơm dơ nâu mong đak Krông Pách thượng, tơ băt, tơ drong kon pơ lei tơ gŭm băl pơm hnam hlôi hơ met pơ ‘lơ̆ng ăn apŭng lơ̆m khei ‘năr jĭ hơ buh krê hơ mơt, ưh kơ gơh hơ met ăn khŭl jang tơ gŭm kon pơ lei. Ƀơ̆t băt, apŭng hlôi tơ gŭm rim grŭp pơm hnam răt đak nhă, tơ mam yua kăl, che gom vă tang găn jĭ. Mă lei hăm kơ sô̆ unh hnam kon pơ lei năm oei tơ̆ plei hle tôch kơ lơ, dang 230 ŭnh hnam oei tơ̆ hơ nih oei hle kơ sô̆ 1 păng vă jê̆ 500 unh hnam oei tơ̆ hơ nih oei hle kơ sô̆ 2, ƀơ̆t mă jĭ hơ buh oei pơ dui đunh, Anih vei lăng kon pơ lei apŭng păng Anih vei lăng tơ drong jang kơ dêh char tŏk bŏk jang hơ dai, pơ jing trong jang tơ gŭm jên kla năr jang ăn rim grŭp pơm hnam. Tơ drong ‘nâu gô vei sơ đơ̆ng jơ hngơ̆m jang đơ̆ng kon pơ lei kŭm nhen pơ lung kon pơ lei vă tơ drong jang oei tơ̆ plei hle iŏk đei tơ drong hơ găt tơ lĕch ăn lơ̆m tơ drong hrei ‘nâu:

          “Jên tơ gŭm ‘noh dang ei trong jang Anih vei lăng tơ drong jang dêh char tŏk bŏk pơ jing, apŭng gô pơ gơ̆r ‘măng hop akŏm vă hơ len lăng tơ drong tơm găh jên âu. Đơ̆ng rŏng ‘noh, tơ dăh đei kĭ ăn ‘noh nhôn gô yua jên âu kla ăn rim unh hnam kon pơ lei vang tơ gŭm dôm unh hnam ‘nao truh oei tơ̆m plei hle,‘noh jĭ 200.000 hlak jên 1 năr jang.”

Kon pơ lei oei tơ̆ plei hle đơ̆ng tơ drong jang pơm dơ nâu mong đak Krông Pách thượg tơ gŭm băl pơm hnam lơ̆m khei ‘năr jĭ Covid-19 đei ƀôh krê hơ mơt tơ̆ Dak Lak

Lơ̆m khei ‘năr jĭ hơ buh đei ƀôh krê hơ mơt, tơ drong jang năm oei tơ̆ plei hle đơ̆ng tơ drong jang pơm dơ nâu mong đak Krông Pách thượng tơ ƀơ̆t 1,2 mơ mat tat. Hăm jơ hngơ̆m đon tơ goăt tơ goăl, kon pơ lei tơ̆ âu tŏk bŏk tơ gŭm băl vă tơ drong oei tơ̆ plei hle iŏk đei tơ drong hơ găt tơ lĕch ăn ‘noh jăh sơ đơ̆ng tơ drong arih sa dôm unh hnam kon pơ lei.

Công Bắc: Chih

Thuem: Tơ blơ̆