VOV4.Bahnar - Vang tơgŭm djru dĭh băl lơ̆m tơdrong mơmat tat ăn kon pơlei tŏk bŏk pơvang tang găn păng khŭl bơ̆ jang tang găn jĭ hơbŭh pơlei tơm Hồ Chí Minh păng rim dêh char Bình Dương, Đồng Nai, dôm năr au, jơ̆p lơ̆m dêh char Dak Nông, rim Khŭl jang kơ yuơ tơpôl, atŭm hăm dôm bơngai đei jơhngơ̆m đon ‘lơ̆ng păng kon pơlei vang chă tơra tơgŭm, chơ ba kơ hrĕng tân ‘nhot, ƀum plei pôk ăn hăm ‘mĕh vă vang tơpŭh jĭ Covid-19. 

Akŏm tơmam drăm sa pơtrŭh tơgŭm ăn kon pơlei oei tơ̆ pơlei tơm Hồ Chí Minh păng rim dêh char Đông Nam Bộ

Jô̆ đơ̆ng năr 23/6 trŭh năr 12/7, Khŭl chĕp pơgơ̆r Lui Phật dêh char Dak Nông hlôi tơra đei 142 tân phe, ‘nhot, ƀum iĕ, prit, mit, tôl, ƀơ tơgŭm kon pơlei tơring jĭ hơbŭh.

Tơ̆ apŭng Dak G’long hlŏh 70 tân ƀum sơƀei,ƀơ, ‘nhot hla sơƀei hlôi đei khŭl bơ̆ jang vang hơvơn. Tơ̆ apŭng Dak Song  păng apŭng Tuy Đức hlŏh 60 tân ‘nhot, ƀum, plei păng 6.000 tŏ kơtăp iĕr bip jei đei kon pơlei pơtrŭh ăn tơring đei jĭ hơbŭh...

Tơblơ̆ nơ̆r: Amazưt